देवघाट, साउन १६
देवघाट गाउँपालिकाका नवनिर्मित प्रशासकीय भवनमा बुधबार पहिलो पटक कार्यपालिकाको बैठक सम्पन्न भएको छ । उक्त प्रशासकीय भवन निर्माण पुरा भई हस्तान्तरणको प्रक्रिया बाँकी भएपनि बुधबार पहिलो पटक कार्यपालिकाको बैठक राखिएको प्रमुख प्रशासकीय अधिकृत गौरीप्रसाद आचार्यले बताए ।
उक्त कार्यपालिकाको बैठकले जतिसक्दो चाँडो भवन हस्तान्तरण गर्न निर्माण व्यवसायीलाई अनुरोध गरेको छ । बैठक नियमित रहेको र अन्य खासै महत्वपुर्ण निर्णय नभएको प्रमुख प्रशासकीय अधिकृत आचार्यले बताए ।
सो भवनमा गाउँपालिकाका केही शाखाहरु सारिसकिएको छ भने अव चाँडै नै अध्यक्ष, उपाध्यक्ष, प्रमुख प्रशासकीयको कार्यकक्ष र लेखा सहितका महत्वपुर्ण शाखाहरु स्थान्तरण गरि पुर्ण रुपमा भवनबाटै सेवा सन्चालन गर्ने तयारी रहेको प्रमुख प्रशासकीय अधिकृत आचार्यले बताए । भवनको भित्री केही कोठाहरुमा कार्पेट विच्छ्याउने काम बाँकी रहेको र बाहिरी कम्पाउन्डको काम पनि केही बाँकी रहेको बताईएको छ । उक्त काम सकिएलगत्तै सबै शाखाहरु उक्त भवनबाट नै सन्चालन गर्ने तयारी भएको छ ।
वडा नम्बर ५ को क्युँदीमा २५ रोपनी क्षेत्रफलको जग्गामा २०७७ असारबाट भवन निर्माण सुरु गरिएको थियो । सुरुमा २ वर्षको लागि रविना÷अविसा जेभी काठमाडौंसँग निर्माण सम्झौता गरिएपनि गत असार मसान्तसम्म म्याद थपिएको थियो । कुल सात करोड ५० लाख ४९ हजार ५ सय ८० रुपैयाँको लागत इस्टमेट रहेपनि टेन्डर प्रक्रिया मार्फत ५ करोड ४१ लाख ४९ हजार ५ सय ८० रुपैयाँमा निर्माण सम्झौता भएको थियो ।
