देवघाट, असोज १५
गत असोज ११ गते शुक्रबार राती आएको बाढीले देवघाट गाउँपालिका–५ साँढेबगर स्थित महादेव आधारभुत विद्यालय डुबानमा परेर पठन पाठन अवरोध भएपछि नजिकैको प्रतिक्षालय राखेर विद्यार्थीहरुलाई पढाउन थालिएको छ ।
विद्यालय भित्र बाढी पसेर कुनै पनि कक्षा कोठामा तत्कालै पठन पाठन सुचारु गराउन नसकिने भएपछि विद्यार्थीलाई नजिकैको प्रतिक्षालयमा लगेर पढाउन थालिएको विद्यालयका प्रअ शिवहरी वाग्लेले बताए । विद्यालयमा कालिगन्डकी नदीको बाढी पस्दा ठुलो क्षती भएको छ ।
विद्यालयमा बाढी पसेपछि प्रशासनिक कक्षमा रहेको सम्पुर्ण आर्थिक र शैक्षिक अभिलेख नष्ट भएको विद्यालयका प्रअ शिवहरी वाग्लेले बताए । प्रअ वाग्लेका अनुसार विद्यालयका सबै कक्षा कोठाको भौतिक सम्पत्तीहरु प्नि क्षती भएका छन् । साउन्ड सिष्टम, कार्पेट, टेवल, कुर्सी, खाद्यान्न, पकाउने भाडा बर्तन, खेलकुँद सामाग्री लगायतका संरचनामा क्षती पुगेको छ । साथै गत आर्थिक वर्षको लेखा परिक्षणको लागि तयार पारिएको बिल भरपाई र भौचरहरु समेत सबै नष्ट भएको प्रअ वाग्लेले बताए ।
यस अघि गत असार २२ गते आएको बाढीले पनि उक्त विद्यालय डुबानमा परेको थियो । उक्त विद्यालयमा १४ जना विद्यार्थी अध्ययनरत छन् । नदी किनारमा विद्यालय हुँदा हरेक वर्षायाममा विद्यालय जोखिममा परेको हुँदा अलि सुरक्षित स्थानमा विद्यालय सार्नुको विकल्प नभएको प्रअ वाग्लेले बताए ।
