दमौली, असोज १५
बन्दिपुर गाउँपालिकाको डुम्रेमा रहेको बन्दिपुर केवलकार चोकको वटम स्टेशन परिसरमा दशैंको अवसर पारेर सांस्कृतिक एवं देवीलिला प्रर्दशनी हुने भएको छ । आगामी असोज १९ गते देखि २४ गते फुलपाती सम्म ६ दिन सम्म प्रदर्शनीको आयोजना गरिएको छ ।
मेलामा स्थानीय तथा राष्ट्रिय सांस्कृतिक प्रस्तुती समेत रहनेछन । नाम चलेका कलाकारहरुको प्रस्तुति कार्यक्रममा हुने छ । साँझमा भव्य दिव्य भगवतीको आरती सहित बृहत् देवीलिला नाटक मंचन गरिने छ । असत्य माथी महाकाली बनेर दुष्ट राक्षसको अन्त गरेर सत्यको जित गराइएको उत्कृष्ट कथा समेटेकोे देवीको लिलाका भब्य प्रदर्शनी गरीने भएको छ ।
दशैंलाई बिजय दशमी भनेर किन मानिने गर्दछ भन्ने कुरा को बयान नाटकले गर्ने छ।२० गते देखि दैनिक ५ घण्टा २४ गते सम्म २५ घण्टा नाटक मञ्चन गरेर दर्शकहरुलाई सांस्कृतिक मनोरञ्जन र सचेतना दिने आयोजकले दावी गरेको छ । सांस्कृतिक कार्यक्रममा सहभागी हुनको लागि केवलकारको टिकट किन्दा प्रवेश निःशुल्क हुनेछ । अन्य अवस्थामा एक सय रुपैयाँ प्रवेश शुल्क लाग्नेछ । कार्यक्रमको आयोजना बन्दीपुर हिलले गरेको छ भने केवलकार र ड्राईभ ईन रेष्टुरेण्टले प्रर्वद्धन गरेका छन् ।
कार्यक्रममा आकर्षणहरुको रुपमा मुख्य आकर्षण देवीलिला नाटक ५ दिन, पाँचदिन सांस्कृतिक कन्सर्ट, खाना खाजा प्रर्दशनी, स्थानीय कला एवं सांस्कृतिक प्रर्दशनी, दशैं हाट बजार, वालउद्यांन, बिङ्गो गेम लगायत मनोरञ्जनात्मक कार्यक्रमहरु रहने छन् । यस मेलाको धार्मिक आकर्षण खड्गदेवी मन्दिरको दर्शन गराउनको लागि केवलकारले विशेष सेवा समेत पस्कने कम्पनीका अध्यक्ष रामचन्द्र शर्माले बताए ।
