दमौली, कार्तिक १३
व्यास नपा–१ स्थित आदिकवि भानुभक्त क्याम्पसमा निर्माण हुने प्रशासकीय भवन निर्माणका लागि निर्माण कम्पनीसँग सम्झौता भएको छ ।
विद्युतीय बोलपत्रका माध्यमबाट छनोट भएको निर्माण कम्पनी मातृभूमि डेभलपर्स एन्ड इन्जिनियर्स काठमाडौँले स्वीकृत लागत अनुमान बमोजिमको प्रशासनिक भवन निर्माण आगामी २०८२ माघ मसान्तभित्र सम्पन्न गर्ने गरी क्याम्पस र उक्त निर्माण कम्पनीबीच मंगलबार निर्माण सम्बन्धि सम्झौता भएको हो ।
उक्त सम्झौता पत्रमा आदिकवि भानुभक्त क्याम्पसका तर्फबाट क्याम्पस प्रमुख महाप्रसाद हडखले र निर्माण कम्पनीका तर्फबाट कम्पनीका व्यवस्थापक सविन पोखरेलले हस्ताक्षर गरेका थिए । उक्त अवसरमा क्याम्पस सञ्चालक समितिका अध्यक्ष बुद्धिमान श्रेष्ठ, उपाध्यक्ष खर सिं दरै, निर्माण समितिका संयोजक क्याप्टेन सहवीर उचै र आर्थिक समितिका संयोजक गोपाल सुर्खालीको समेत उपस्थिति रहेको थियो ।
सो अवसरमा क्याम्पसका सहायक क्याम्पस प्रमुखहरू डा. रामकुमार अधिकारी र सागर पौडेल क्याम्पसका प्रशासकीय अधिकृत बसन्ती थापा आलेमगर लेखा अधिकृत विष्णुप्रसाद रिजाल र इएमआईएस अफिसर इन्जिनियर अनमोल प्रधान लगायत कर्मचारीहरूको पनि उपस्थिति रहेको थियो ।
सो भवन निर्माणका लागि विश्वविद्यालय अनुदान आयोग सानोठिमी भक्तपुरले क्याम्पसलाई आव ०८१÷०८२ मा १ करोड आर्थिक अनुदान सहायता उपलब्ध गराएको छ। उक्त भवनको निर्माणपछि क्याम्पसको प्रशासनिक कार्यका लागि सहज हुने क्याम्पस प्रमुख महाप्रसाद हड्खलेले बताए ।
