दमौली, कार्तिक १४
तनहुँ जिल्लामा देउसी भैलो राती १० बजेसम्म मात्र खेल्न पाईने भएको छ । जिल्ला प्रशासन कार्यालयले बुधबार सुचना प्रकाशन गरि समग्र जिल्लाको शान्ति सुरक्षाको अवस्थालाई मध्यनजर गरि देउसी भैलो तथा नाचगान जस्ता कार्यक्रमहरु राती १० बजेसम्म मात्र शान्तिपुर्वक रुपमा गर्नुपर्ने जनाएको छ । देउसी भैलो सार्वजानिक यातयात तथा सार्वजनिक जिवनलाई असर नपारी मर्यादित रुपमा खेल्न प्रशासनले अनुरोध गरेको छ ।
जिल्ला प्रशासन कार्यालयले पटका, अतिसबाजी, झिरझिरे, भुईचम्मा जस्ता विस्फोटक पदार्थहरु प्रयोग नगर्न तथा त्यस्ता पदार्थहरुको ओसारपसार र विक्री वितरण समेत नगर्न जिल्लाबासीमा अनुरोध गरेको छ । साथै जुवातास र लङ्गुरबुर्जा समेत नखेल्न र नखेलाउन पनि प्रशासनले अनुरोध गरेको छ ।
सहायक प्रमुख जिल्ला अधिकारी जितबहादुर भण्डारीद्वारा जारी विज्ञप्तिमा मादक पदार्थको सेवन गरि होहल्ला, झैगडा तथा भिडजन्य गतिविधि गरि समाजमा अशान्ति मच्चाउने तथा प्रशासनले जारी गरेको सुचनाको अवज्ञा गरे कानुन बमोजिम कारवाही हुने जनाईएको छ ।
