दमौली, मंसिर २३
जिल्ला समन्वय समितिको स्वामित्वमा रहेको जिल्ला सभागृहको सन्चालनको जिम्मेबारी व्यास नगरपालिकाले लिने भएको छ । जिल्ला सभाले उक्त सभागृहको सञ्चालनको जिम्मा लिन व्यास नगरपालिकालाई प्रस्ताव गरेकोमा व्यास नगरपालिकाको आइतबार बसेको कार्यपालिकाको बैठकले उक्त जिल्ला सभागृह सन्चालनको सन्चालनको जिम्मेबारी लिने निर्णय गरेको हो ।
जिल्ला समन्वय समितिले सन्चालन गर्ने गरि शहरी विकास मन्त्रालयले उक्त जिल्ला सभागृह निर्माण गरेको हो । सभागृह उद्घाटन भएको एक वर्ष पनि पुरा नहुँदै जिल्ला समन्वय समितिले उक्त सभागृह सन्चालन गर्न नसकेपछि सन्चालनको लागि व्यास नगरपालिकालाई प्रस्ताव गरेको थियो ।
नगर कार्यपालिकाको बैठकले नगरपालिका भित्र रिक्त शिक्षक दरवन्दीमा सम्बन्धित विद्यालयहरुको सहमतीमा शिक्षकहरुलाई कामकाजमा खटाउने अधिकार नगर शिक्षा शाखा प्रमुखलाई अधिकार प्रत्यायोजन गर्ने निर्णय गरेको छ । यस्तै आगामी पौष २६ गते हुने नगर सभामा प्रस्तुत गरिने विषयहरु सम्बन्धित विषयगत समितिवाट आगामी पौष १५ भित्र पेश गर्न निर्देशन दिने निर्णय पनि भएको छ ।
यसैगरि व्यास नगरपालिकाबाट सबै वडाहरुमा वितरण गरिने लागत सहभागीताका योजनाहरुमा प्रति वडा १५ लाख रुपैयाँका दरले ग्रामिण वडाहरुमा १५% अर्धशहरी वडाहरुमा २०% र शहरी वडाहरुमा २५% नगद लागत सहभागिता रहने गरि पौष १५ भित्र बढिमा ३ वटा योजनाहरु सम्बन्धीत वडा मार्फत माग गर्ने निर्णय गरेको नगरपालिकाका प्रवक्ता सुरेश थापाले जानकारी दिए ।
यस्तै गरि नगर शिक्षा सुधार योजना र जग्गा वर्गीकरण प्रतिवेदन आगामी पौष ७ गते भित्र पेश गर्न सम्बन्धित शाखालाई निर्देशन दिने निर्णय पनि बैठकले गरेको छ ।
