काठमाडौं, पुस १०
नेकपा एमालेका नेता भीम रावल पार्टी साधारण सदस्यबाटै निष्कासित भएका छन् । बुधबार बसेको एमाले सचिवालय बैठकले उनलाई पार्टीको साधारण सदस्यसमेत नरहने गरी निष्कासित गरेको हो ।
रावल लामो समयदेखि एमालेमा निष्क्रिय बसेका थिए । चितवनमा भएको पार्टीको १० औँ महाधिवेशनमा केपी शर्मा ओलीसँग अध्यक्षमा प्रतिस्पर्धा गरेका रावल त्यसपछि एमालेमा निष्क्रिय थिए ।
रावललाई एमालेमा सक्रिय बनाउन भन्दै ओलीले यसअघि कार्यदल नै बनाई वार्तासमेत गरेका थिए । तर, सो वार्ता एकपटक मात्र भएको थियो । रावल प्रधानमन्त्री तथा अध्यक्ष ओलीको एक आलोचक थिए ।
यस्तै सचिवालय बैठकले स्थायी कमिटी सदस्य विन्दा पाण्डेलाई ६ महिनाका लागि निलम्बन गर्ने निर्णय गरेको छ । उनीसँगै केन्द्रीय सदस्य उषाकिरण तिमिल्सेनालाई पनि ६ महिनाका लागि निलम्बन गरिएको हो । पाण्डे र तिमिल्सेनालाई भाटभटेनीका मालिक मीनबहादुर गुरुङले दिएको जग्गादानबारे विरोध जनाएका थिए । सोही कारण उनीहरूमाथि कारबाही भएको हो ।
