दमौली, पुस १०
गैर सरकारी संस्था महासंघ जिल्ला शाखा तनहुँको आयोजनामा व्यास नगरपालिकाका जनप्रतिनिधिहरुकोलागि जलवायु उत्थानशील कार्य सुदृढिकरण सम्बन्धि एक दिने अभिमुखीकरण कार्यक्रम बुधबार नगरपालिकाको सभाकक्षमा सम्पन्न भयो ।
उक्त कार्यक्रममा बोल्दै व्यास नगरपालिकाका प्रमुख बैकुण्ठ न्यौपानेले जलवायु परिवर्तनका असरहरुलाई न्युनिकरण गर्न नगरपालिकाले जलवायुमैत्री विकास निर्माण र संरचनाहरु निर्माण गर्ने बताए । उनले चालु आर्थिक वर्षको नीति तथा कार्यक्रममा जलवायु परिवर्तनको असरलाई न्युनिकरण गर्ने कार्यक्रम समावेश रहेको बताए ।
मानव जिवनको रक्षाकोलागि जलवायु परिवर्तनका असरहरुलाई न्युनिकरण गर्नुपर्ने भन्दै नगर प्रमुख न्यौपानेले यसका असरलाई न्युनिकरणकालागि जलवायुमैत्री कानुन र संरचना बनाउनु पर्ने बताए । जलवायु परिवर्तनको विषय अहिले विश्वव्यापी रुपमा र सबैभन्दा बढि चासो र छलफलको विषय भएको बताए । नगरपालिकाले वन तथा वातावरण सम्बन्धि ऐन निर्माण गरिएको र प्लाष्टिक मुक्त पालिका बनाउने अभियान सन्चालन भईरहेको प्रमुख न्यौपाने बताए ।
नगरपालिकाकी उपप्रमुख इन्दिरा दरैले लैङ्गिक समतामुलक बजेट तथा कार्यक्रम निर्माण र सामाजिक समावेशीकरणको मुद्धालाई प्राथमिकतामा राखेर काम गरिरहेको बताइन् । गैरसकारी संस्था महासंघका केन्द्रीय सदस्य विना सिलवालले जलवायु परिवर्तनको असरले सबैलाई प्रभाव पारेको हुँदा त्यसको असर न्युनिकरणकोलागि स्थानीय सरकारको एकल प्रयासले मात्र सम्भव नहुने हुँदा यो अभियानमा सबैको साथ र सहयोग हुनुपर्ने बताइन् ।
गैरसरकारी संस्था महासंघ तनहुँका अध्यक्ष प्रकाशचन्द्र भट्टराईको अध्यक्षतामा आयोजित उक्त कार्यक्रममा नगरपालिकाका विभिन्न वडाका अध्यक्षहरु तथा कार्यपालिकाका सदस्यहरुले जलवायु परिवर्तनले समुदायमा परेको असरहरुको बारेमा धारणा राखेका थिए ।
उक्त कार्यक्रममा गैसस महासंघ तनहुँकी सचिव सरिता भण्डारीले जलवायु उत्थानशील विकासको बारेमा सहजिकरण प्रस्तुत गरेकी थिइन् ।
उक्त अवसरमा जलवायु परिवर्तनको कारण, जलवायु परिवर्तनले पारेको असर र प्रभाव तथा जलवायु अनुकुलताको उत्थानशील अभ्यासहरुको बारेमा छलफल भएको थियो । सो कार्यक्रमको सन्चालन गैसस महासंघ तनहुँका सदस्य पुर्ण विकेले गरेका थिए ।
