दमौली, पुस २६
राष्ट्रिय बाख्रा दिवश २०८१ को अवशरमा तनहुँको भानुमा स्थानीय तथा उन्नत बोका प्रदर्शनी प्रतियोगिता हुने भएको छ । ‘पोसिलो आहार, बाख्रा पालनमा गुणस्तर सुधार’ भन्ने नाराका साथ आगामी माघ ४ गते उक्त प्रदर्शनी हुन लागेको हो ।
भानु नगरपालिका पशुपन्छी तथा मत्स्य बिकास शाखा, राष्ट्रिय बाख्रा अनुसन्धान कार्यक्रम बन्दिपुर, भेटेनरी अस्पताल तथा पशुसेवा विज्ञ केन्द्र तनहुँ, बरभञ्ज्याङ बाख्रा पालक समूह र नेपाल ब्यवसायीक बाख्रा पालक महासंघको आयोजनामा भानु नपा–५ को स्याउली पसलमा स्थानीय तथा उन्नत बोका प्रदर्शनी हुन लागेको भानु नगरपालिकाका पशुपंछी तथा मत्स्य बिकास शाखाका अमित ढुँगानाले जानकारी दिए ।
प्रदर्शनीमा प्रथम हुने बोका धनीलाई स्थानीय जात तर्फ १० हजार, उन्नत जात तर्फ १० हजार र द्वित्तीय हुनेलाई ८ हजार, तृतीय हुनेलाई ६ हजार र सान्त्वना हुनेलाई ४ हजार रुपैंया पुरस्कारको ब्यवस्था गरिएको भानु नगरपालिकाका पशुपंछी तथा मत्स्य बिकास शाखाका प्रमुख एवं पशु विकास अधिकृत सुशील ऐरीले बताए ।
उक्त कार्यक्रममा बोका प्रदर्शनी, बाख्राको उत्पादन परिकार प्रदर्शनी, बाख्राको सुधारिएको मलको प्रदर्शनी, मनोरञ्जन तथा साँस्कृतिक कार्यक्रम र पुरस्कार वितरण कार्यक्रम रहेको नगरपालिकाका प्रशासकीय अधिकृत सुनिल पाण्डेले जानकारी दिए ।
भानु नगरपालिकाका नगर प्रमुख आनन्दराज त्रिपाठीले यस्ता प्रदर्शनीले पशुपालन तर्फ आकर्षित गराउन सकिने भन्दै भानु नगरपालिकालाई मासुमा आत्मनिर्भर बन्न सहयोग पुग्ने विश्वास ब्यक्त गरे । नगरपालिकाकी उप–प्रमुख उमा गोतामेले नगरपालिकाले किसानका लागि आवश्यक पर्ने प्राविधिक एवं अन्य सहयोगको कार्यक्रम पनि सन्चालन गर्न जोड दिई रहेको जानकारी दिइन् ।
नगरपालिकाका प्रमुख प्रशासकीय अधिकृत गौतम भण्डारीले नगरपालिकाले आगामी आर्थिक वर्षको बजेटमा कृषिलाई प्राथमिकता दिनुपर्ने बताए ।
