देवघाट, माघ १
लोकप्रिय कथा वाचिका देवी प्रतिभा (प्रतिभा पराजुली) देवघाटधाममा मंगलबारबाट सन्चालित देवघाट महा–महोत्सव स्थलमा आईपुग्दा हजारौं दर्शनार्थीले स्वागत गरेका थिए ।
उनलाई ठिमुरा रिर्साेटबाट महा–महोत्सवका संकल्पकर्ता इश्वरकृष्ण महाराज सहित महा महोत्सव मुल आयोजक समितिका संयोजक डा.केशव भुर्तेल लगायत महोत्सवका आयोजकहरुले स्वागत गरि महोत्सव स्थलमा ल्याएका थिए । महा–महोत्सवमा देवी प्रतिभा सबैको आकर्षणको केन्द्र बनेकी थिइन् ।
ठिमुरा रिर्साेटबाट महा–महोत्सवको सचिवालय रहेको विश्व जागरण महाअभियान ट्रस्टको कार्यालयसम्म गाडीमा आएकी देवी प्रतिभा त्यहाँबाट महोत्सव स्थलसम्म भने पैदल गएकी थिइन् । उनलाई पन्चेबाजाले स्वागत गरिएको थियो । उनको सुरक्षाकोलागि उनले भारतबाटै ल्याएकी एक दर्जन नीजि सुरक्षाकर्मी खटिएका थिए ।
देवी प्रतीभाले माघ ९ गतेसम्म देवघाट महा–महामहोत्सवमा कथा वाचन गर्नेछिन् । यसअघि पशुपतिनाथ मन्दिरमा करिब १५ दिन कथा वाचन गरेर नेपालीको मन जितेकी २३ वर्षीया काभ्रेली चेली विश्वकै बढी खोजीने कथावाचिकाको रुपमा पर्छिन् ।
