दमौली, माघ ३०
राष्ट्रिय प्रजातन्त्र पार्टीका अध्यक्ष राजेन्द्र लिङदेनले देशका दुई ठुला पार्टीहरु नेपाली काँग्रेस र एमालेको गठबन्धन भ्रष्टाचारी जोगाउनको लागि भएको आरोप लगाएका छन् । बुधबार दमौलीमा आयोजित कार्यकर्ता भेलालाई सम्बोधन गर्दै अध्यक्ष लिङदेनले । विगतमा गरेको भ्रष्टाचारबाट कसरी जोगिने भन्ने उद्देश्यले नै दुई ठुला पार्टीहरु मिलेको आरोप लगाए । ‘बाचुन्जेल आफ्नो विरुद्ध छानविन हुन नदिन ठुला पार्टीहरु मिलेका रहेछन्’ उनले भने ‘संविधान संशोधनको बाचा सहित बनेको गठबन्धन आफ्नो प्रतिबद्धता विपरित भ्रष्टाचारमा लिप्त बनेको छ ।’
ठुला पार्टीहरु भ्रष्टाचार र ठुला आयोजना बेचेर खाने मात्र हैन, मौका मिल्यो भने देशै बेचेर खाने स्थितीमा रहेको उनले आरोप लगाए । काँग्रेस र एमाले जस्ता ठुला पार्टीहरु मिलेर सरकार बनाउँदा पनि सुशासन आएको र समृद्धि आएको छैन भन्दै उनले अव सामान्य नागरिक भएर सोच्नुपर्ने र देश बचाउन जाग्नुपर्ने बताए ।
देश गम्भिर स्थितीमा रहेको भन्दै उनले देशको अवस्था आँधी आउनु अघिको सन्नाटाको अवस्थामा रहेको बताए । देशभरी राप्रपामा आकर्षण बढेको भन्दै उनले भने ‘तपाईहरु ठिक ठाउँमा आउनु भएको छ । राप्रपामा प्रवेश गर्दा कहिले पनि पश्चाताप गर्न पर्दैन ।’
उक्त कार्यक्रममा राप्रपाका बरिष्ठ उपाध्यक्ष विक्रम पाण्डे लगायतका नेताहरुको उपस्थिती रहेको थियो । कार्यक्रममा राप्रपा तनहुँका अध्यक्ष बिनोद घर्तीले अध्यक्ष लिङदेन सहतिका नेतालाई स्वागत गरेका थिए ।
यसैविच अध्यक्ष लिङदेन सहतिका नेताहरुले बुधबार बिहान तनहुँको प्रसिद्ध धार्मिक स्थल छाब्दी बाराही मन्दिरको दर्शन गरि पुजा गरेका थिए ।
