तनहुँ । जेठ १७
गण्डकी प्रदेशमा राइड शेयरिङलाई कानुनी मान्यता दिने नयाँ नियमावलीविरुद्ध शुक्रबारदेखि सार्वजनिक यातायात पूर्ण रूपमा ठप्प पारिएको छ । नेपाल यातायात व्यवसायी राष्ट्रिय महासंघअन्तर्गतको ‘सार्वजनिक यातायात बचाउ संघर्ष समिति’ ले तीन बुँदे मागसहित आन्दोलन थालेको हो ।
संघर्ष समितिले राइड शेयरिङसम्बन्धी नियमावली खारेज गर्नुपर्ने, सार्वजनिक सवारी सञ्चालन सम्बन्धी स्पष्ट नीति ल्याउनुपर्ने र सामाजिक सुरक्षा कोष अनिवार्य गर्नुपर्ने माग अघि सारेको छ ।
नेपाल यातायात व्यवसायी राष्ट्रिय महासंघ गण्डकी संयोजक केदारप्रसाद पौडेलका अनुसार गण्डकी प्रदेशमा जेठ १६ र केन्द्रीय कार्यक्रमअनुसार जेठ १९ देखि देशभर यातायात सेवा ठप्प हुनेछ । गण्डकी सरकारले जेठ १ गते ‘राइड शेयरिङ (नियमन तथा व्यवस्थापन) नियमावली २०८२’ राजपत्रमा प्रकाशित गर्दै निजी प्रयोजनका रातो नम्बर प्लेट भएका दुईपाङ्ग्रे र चारपाङ्ग्रे सवारीलाई यात्रु ओसारपसारमा प्रयोग गर्न कानुनी मान्यता दिएको थियो । तर, यातायात व्यवसायीहरूले यस व्यवस्थाले अहिलेको ‘यातायात व्यवस्था ऐन २०४९’ को प्रावधान उल्लंघन गरेको आरोप लगाएका छन् ।
आन्दोलनको प्रभावले गण्डकीका सबै ११ जिल्लामा लामो तथा छोटो दूरीका बस, ट्याक्सी र ढुवानी सेवा ठप्प छन् । यसका कारण परीक्षार्थी, बिरामी र सर्वसाधारण यात्रुहरूलाई ठूलो सास्ती भोग्नुपरेको छ । यद्यपि सरकार वार्ताका लागि समिति गठन गरिसकेको भए पनि संघर्ष समितिले आफ्ना माग सम्बोधन नभएसम्म वार्ता प्रक्रिया अघि नबढाउने अडान लिएको छ ।
