अन्जान परियार । तनहुँ, जेठ १८
भिमाद नगरपालिका–५ बुढाकोट निवासी दम रोगबाट पीडित कुमारी परियारलाई नेकपा एमाले भिमाद नपा वडा नम्बर ५ कमिटीले आर्थिक सहयोग स्वरूप २० हजार प्रदान गरेको छ । हाल परियार चितवनस्थित पुरानो मेडिकल कलेज अस्पतालमा उपचाररत छिन् । स्वास्थ्य अवस्था जटिल हुँदै गएको र उपचारमा आर्थिक अभाव देखिएपछि नेकपा एमाले वडा नं. ५ कमिटीको पहलमा सहयोग संकलन गरी सहयोग हस्तान्तरण गरिएको हो ।
पीडित परियार केही दिनदेखि अस्पतालमा भर्ना भई दम रोगसँग संघर्ष गरिरहेकी छिन् । उनको उपचारमा कठिनाइ भइरहेको खबर पाएपछि एमाले वडा कमिटीले मानवीय सेवाको भावनासाथ सहयोग संकलन गरी आवश्यक सहयोग गरेको नेकपा एमाले भिमाद नगर कमिटि सदस्य संगिता विकले बताइन् ।
संकलित सहयोग रकम बिरामीकी छोरा धन बहादुर परियारलाई नेकपा एमाले भिमाद नगर कमिटी सदस्य संगिता विकले हस्तान्तरण गरेकी थिइन् । उक्त सहयोग हस्तान्तरण कार्यक्रमका क्रममा विकले सहयोगदाताहरूलाई धन्यवाद दिँदै यस्ता कार्यहरूले समाजमा एकता, माया र सेवा भावनालाई अझ मजबुत बनाउने विश्वास व्यक्त गरिन् ।
नेकपा एमाले भिमाद वडा नम्बर ५ कमिटीको यो कदमले सामाजिक उत्तरदायित्व र मानवतावादी व्यवहारको ज्वलन्त उदाहरण प्रस्तुत गरेको धनबहादुरले बताए ।
