तनहुँ । जेठ २०
भानु नगरपालिका स्वास्थ्य शाखाको आयोजनामा डेंगु रोगको नियन्त्रण तथा रोगथामको लागि अभिमुखिकरण कार्यक्रम गरिएको छ ।
मंगलबार भानु नगरपालिका प्रमुख आनन्दराज त्रिपाठीको अध्यक्षतामा भएको कार्यक्रममा उप–प्रमुख उमा गोतामे , प्रदेश जनस्वास्थ्य कार्यालय तनहुँका प्रमुख अमर दवाडी, स्वास्थकर्मी, जनप्रतिनिधि, सामाजिक अगुवा, कर्मचारी, सुरक्षाकर्मी, राजनैतिक दलका प्रतिनिधी लगाएतको सहभागिता रहेको थियो ।
कार्यक्रममा सहभागीहरूलाई डेंगु रोगको कारण, लक्षण, उपचार विधि र रोकथामका उपायबारे विस्तृत जानकारी दिइएको थियो ।
कार्यक्रममा बोल्दै नगर प्रमुख त्रिपाठीले ‘डेंगु रोग नियन्त्रण सामूहिक प्रयासमार्फत मात्र सम्भव रहेको र नगरपालिकाले नियमित सरसफाइ अभियान, जनचेतनामूलक कार्यक्रम र स्वास्थ्य संस्थासँग समन्वय गरेर यो कार्यलाई प्रभावकारी बनाउने प्रष्ट पारे । उप–प्रमुख उमा गोतामेले डेंगु नियन्त्रणका लागि समुदायले सरसफाइमा ध्यान दिनु पर्ने बताइन् ।
