तनहुँ । असार १८
बन्दीपुर गाउँपालिकाले सुन्तला बगैंचा स्थापना सुरु गरेको छ । वडा नम्बर ५ र ६ का किसानलाई लक्षित गरि गाउँपालिकाले सुन्तला बगैंचा स्थापनाको सुरुवात गरेको हो । सुन्तला बगैंचा स्थापनाको लागि वडा नम्बर ५ का किसानलाई तिन हजार सुन्तलाको विरुवा वितरण गरिएको छ ।
नमुना सुन्तला बगैंचा स्थापना सहित किसान परिचालन र क्षेत्रफल विस्तार कार्यक्रम अन्तर्गत बन्दिपुर गाउँपालिका–५ का किसानहरुलाई सुन्तलाका बिरुवाहरु र आवश्यक सामाग्री बितरण गरिएको हो ।
बन्दीपुर गाउँपालिकाका अध्यक्ष सुरेन्द्र थापाले मंगलबार वडा नम्बर ५ को झारगाउँ र कोरिखाका किसानलाई सुन्तलाको विरुवा वितरण गरेका थिए । उक्त अवसरमा बोल्दै अध्यक्ष थापाले गाउँपालिका भित्र कहाँ कहाँ सुन्तलाको खेती हुन्छ, त्यहाँ सन्तला बंगैचा स्थापना गर्ने उद्देश्य रहेको बताए ।
गाउँपालिकाले सुन्तलाको विरुवा वितरणकोलागि सुचना प्रकाशन गर्दा पनि कसैको निबेदन नआएको भन्दै दोश्रो प्रयासमा साना किसान सहकारी संस्था मार्फत ३ हजार विरुवा वितरण गरिएको हो बताए । उक्त कार्यक्रममा वडा नम्बर ५ का अध्यक्ष ध्रुवप्रसाद लामिछानेले पनि मन्तव्य राखेका थिए ।
