तनहुँ । असार २५
आँबुखैरेनी गाउँपालिका–२ र ४ मा अवस्थित ऐना पहरामा निर्माण भैरहेको स्काईवाक अन्तिम चरणमा पुगेको छ । साहसिक खेल प्रेमीहरूको लागि ऐनापहरा स्काईवाक एक नयाँ गन्तव्य बन्ने भएको छ ।
यो स्काईवाक नेपालको सम्भवतः सबैभन्दा अग्लो (५० मिटर) र लामो (८८ पाइला) पुल हुनेछ, जसले पर्यटकहरूलाई एक अनौठो साहसिक अनुभव प्रदान गर्नेछ । पुलको प्रत्येक पाइला बीचमा १ फिटको खाली स्थान राखिएको छ, जसले यात्रुहरूलाई हावामा उडिरहेको जस्तो अनुभव दिनेछ ।
गाउँपालिका अध्यक्ष शुक्र चुमानका अनुसार, ‘यस परियोजनाले क्षेत्रको पर्यटन सम्भावना र स्थानीय अर्थतन्त्रमा सुधार ल्याउनेछ ।’ उनले भने ‘हामीलाई यो विश्वास छ कि ऐनापहरा स्काईवाकले तनहुँ, गोरखा, लमजुङ, कास्की, चितवन जिल्ला सँगै सम्पूर्ण नेपालको पर्यटन र साहसिक उद्योगलाई नयाँ दिशा दिनेछ । यसले स्थानीय व्यवसाय र समुदायलाई सशक्त बनाउनेछ ।’
