तनहुँ । साउन १०
संघीय मामिला तथा सामान्य प्रशासन मन्त्री भगवती न्यौपानेले बन्दीपुर गाउँपालिकाको वडा नम्बर ६ को धरमपानीले आफुलाई ठुलो गुन लगाएको बताएकी छिन् । शनिबार बिहान धरमपानीमा आयोजित कार्यक्रमलाई सम्बोधन गर्दै उनले पार्टीको संगठन निर्माणको क्रममा आफु धरमपानीमा आइपुग्दा यहाँका जनताले निकै माया र सहयोग गरेको भन्दै उक्त मायाको गुन तिर्न आफु लागि परेको बताइन् ।
आफु मन्त्री नहुँदा पनि धरमपानी वरपरको विकासको लागि यसअघि नै २५ करोड भन्दा बढि बजेट बिनियोजन गर्न पहल गरेको र केही महिना अघि मात्रै बन्दीपुर–धरमपानी सडकलाई भौतिक पुर्वाधार मन्त्रालय मार्फत ४ करोड रुपैयाँ विनियोजन गरेको भन्दै न्यौपानेले यसवर्ष पनि त्यो भन्दा बढि बजेट बिनियोजन हुने विश्वास दिलाईन् ।
बन्दीपुर–धरमपानी–सराङघाटलाई कालोपत्रे गरि बन्दीपुरको विकासमा टेवा पुग्ने काम गर्ने भन्दै उनले बन्दीपुर तथा धरमपानी र यस वरपरको क्षेत्रको विकासमा विशेष चासो राख्ने बताइन् ।
उक्त कार्यक्रममा बन्दीपुर गाउँपालिकाका अध्यक्ष सुरेन्द्रबहादुर थापा, उपाध्यक्ष पन्चमाया गुरुङ, वडा नम्बर ६ का वडा अध्यक्ष बलबहादुर गुरुङ लगायतले धरमपानीसम्म आइपुग्ने सडक निकै कच्ची र अप्ठेरो भएको भन्दै उक्त सडकलाई स्तरीकरण गर्न ठुलै रकमको आवश्यकता पर्ने हुँदा सो को लागि पहल गर्न मन्त्री न्यौपानेलाई आग्रह गरेका थिए ।
