विवेक श्रेष्ठ । तनहुँ, साउन १५
धेरै लाभग्राही सदरमुकाम दमौलीमा बसेपछि ऋषिङ्ग गाँउँपालिका वडा नम्बर ३ दमौलीमा आएर सामाजिक सुरक्षा परिचयपत्र नविकरण गरिएको छ। विहिबार वडा अध्यक्ष भिमबहादुर थापा सहित जनप्रतिनिधि र कर्मचारीहरु दमौली आएर सामाजिक सुरक्षा भत्ताको परिचयपत्र नविकरण गरेका हुन्
वडा नम्बर ३ का ३५० लाभग्राही मध्ये करिब सय जना दमौलीमा बस्छन् । त्यसबाहेक पोखरा, काठमाडौं, स्याङजा, चितवन, हेटौंडा, नवलपुर तथा देशका अन्य स्थानमा बस्दै आएका लाभग्राहीको संख्या पनि उत्तिनै छ । दमौली सहित पोखरा, काठमाडौं, स्याङजा, चितवन, हेटौंडा, नवलपुर तथा देशका अन्य स्थानमा बस्ने लाभग्राहीको सुविधाको लागि सदरमुकाम आएर सामाजिक सुरक्षा भत्ताको परिचयपत्र नविकरण गरिएको वडा अध्यक्ष थापाले बताए ।
गत साउन ९ गतेदेखी १३ गतेसम्म वडाका १३ वटै टोलमा पालैपालो पुगेर सामाजिक सुरक्षा भत्ताको परिचयपत्र नविकरण गरिएको र धेरै लाभग्राही वडा भन्दा बाहिर रहेको कारण सदरमुकामा आएर एक दिन सेवा दिईएको वडा अध्यक्ष थापाले बताए । दमौलीमा परिचयपत्र नविकरण गर्ने बारेमा यस अघि नै सुचना जारी गरिसकिएको उनले बताए ।
यातयात तथा अन्य कारणले आफुहरु परिचयपत्र लिन सम्बन्धित टोलमा पुग्न नसक्दा वडाले सदरमुकाममै आएर सेवा उपलब्ध गराउँदा निकै खुसी लागेको एक लाभग्राहीले बताइन् ।
