तनहुँ । कार्तिक २७
बन्दीपुर गाउँपालिकाको आयोजनामा भएको सातौं राष्ट्रपति रनिङ शिल्ड प्रतियोगिता, २०८२ को उपाधी वडा नम्बर १ स्थित पवित्रा माविले उचालेको छ । मंगलबारदेखी आयोजित उक्त प्रतियोगितामा पवित्रा माविले १६ स्वर्ण, २ रजत र ५ कास्य पदकसहित प्रथम स्थान हासिल गरेको हो ।
त्यस्तै भानु माध्यमिक विद्यालयले ४ स्वर्ण, ५ रजत र ९ कास्य पदकसहित द्वित्तीय स्थान प्राप्त गर्न सफल भयो भने मनास्लु बोर्डिङ स्कुलले ४ स्वर्ण, ५ रजत र ५ कास्य पदकसहित तृतीय स्थान हासिल गरेको छ ।
प्रतियोगितामा भलिबल (छात्र–छात्रा) सहित एथलेटिक्सका विभिन्न स्पर्धाहरु १००, २००, ४००, ८००, १५०० र ३००० मिटर दौड, ४×१०० र ४×४०० मिटर रिले, साथै फिल्ड इभेन्ट्स हाइजम्प, लङ जम्प, ट्रिपल जम्प, ज्याभलिन थ्रो र सटपुटमा प्रतिस्पर्धा गरिएको थियो ।
प्रतियोगिताको समापन कार्यक्रमलाई सम्बोधन गर्दै गाउँपालिकाका अध्यक्ष सुरेन्द्रबहादुर थापाले विद्यार्थीहरूमा विकास भएको आत्मविश्वास, अनुशासन, नेतृत्व र खेलभावनाले भविष्यमा बन्दीपुरलाई अझ उज्यालो बनाउने विश्वास व्यक्त गरे ।
उक्त कार्यक्रममा गाउँपालिकाका उपाध्यक्ष पन्चमाया गुरुङ, प्रमुख प्रशासकीय अधिकृत कमलबहादुर केसी, वडा नम्बर १ का अध्यक्ष एवं प्रवक्ता शिवकुमार श्रेष्ठ, वडा नम्बर ३ का अध्यक्ष परमेश्वर भट्टराई, शिक्षा शाखाका प्रमुख भिम लामिछाने लगायतले मन्तव्य राखेका थिए ।
