तनहुँ । मंसिर १
आँबुखैरेनी गाउँपालिका स्तरीय सातौँ राष्ट्रपति रनिङ शिल्ड प्रतियोगिता–२०८२ को उपाधि रामशाह माविले जितेको छ । आँबुखैरेनी–२, मार्कीचोकस्थित रंगशाला र रामशाह माध्यमिक विद्यालयको खेलमैदानमा आयोजित उक्त प्रतियोगितामा रामशाह माविले १७ स्वर्ण, ६ रजत र २ कास्य पदक सहित प्रथम स्थान हासिल गरेको हो ।
त्यस्तै मित्रता माविले ५ स्वर्ण, १० रजत र ८ कास्य पदकसहित दोस्रो स्थान, भने फ्यूचर स्टार सेकेन्डरी बोर्डिङ स्कुलले ४ स्वर्ण, ५ रजत र ५ कास्य पदकसहित तेस्रो स्थान हात पारेको छ । प्रतियोगितामा गाउँपालिकाका पाँच सामुदायिक र पाँच संस्थागत गरी १० विद्यालयको सहभागिता रहेको थियो । २८ विधामा सम्पन्न प्रतियोगितामा एथलेटिक्सका सम्पूर्ण विधा रंगशालामा, भने भलिबल प्रतियोगिता रामशाह माध्यमिक विद्यालयमा सञ्चालन गरिएको गाउँपालिका शिक्षा, युवा तथा खेलकुद शाखा प्रमुख निर्मला कुवँरले जानकारी दिइन् ।
समापन समारोहमा आँबुखैरेनी गाउँपालिका अध्यक्ष शुक्र चुमानले खेलकुदले स्वास्थ्य मात्र होइन, युवापुस्तामा अनुशासन, सहकार्य र राष्ट्रिय चेतना अभिवृद्धि गर्ने बताए । उनले आगामी दिनमा पनि यस्ता प्रतियोगिताहरूलाई निरन्तरता दिने र गाउँपालिका स्तरमै खेलकुद प्रवद्र्धनमा जोड दिने बताए । मंसिरको अन्तिम साता आँबुखैरेनी रंगशालामा विद्यालय स्तरीय फुटबल प्रतियोगिता र वडा स्तरीय भलिबल प्रतियोगिता आयोजना गरिने अध्यक्ष चुमानले जानकारी दिए ।
