तनहुँ । माघ ४
नेपाली काँग्रेसको जोशी समुहले पनि प्रतिनिधि सभा निर्वाचनमा उम्मेदवारी दिने भएको छ । जोशी समुहको आइतबार दमौलीमा सम्पन्न भेलाले तनहुँका दुबै निर्वाचन क्षेत्रमा उम्मेदवारी दिने निर्णय गरेको सो समुहका नेता दिपकराज जोशीले बताए ।
नेपाली कांग्रेस स्वतन्त्र अभियानका संयोजक हरिशरण पण्डितको अध्यक्षता र नेपाली कांग्रेसका नेता सुकुमलाल गुरुङको प्रमुख आतिथ्यतामा भएको भेलाले तनहुँका दुबै निर्वाचन क्षेत्रमा उम्मेदवारी दिने निर्णय गरेको हो । उक्त समुहले उम्मेदवारको रुपमा क्षेत्र नम्बर १ बाट सुकुमलाल गुरुङ र दिपकराज जोशी तथा क्षेत्र नम्बर २ बाट हरिशरण पण्डित र नरेन्द्र थापा मगरलाई उम्मेदवारका रूपमा सिफारिस गरेको छ ।
उक्त भेलामा नेपाली कांग्रेसकी नेत्री तथा संविधान सभा सदस्य उर्मिला थापा, नेपाली कांग्रेस महाधिवेशन प्रतिनिधि डिल्लीराम अधिकारी, कांग्रेसका नेताहरू घनश्याम घिमिरे, परशुराम गिरी, ऋषिराम पोखरेल, दीपकराज जोशी, भानु नगरपालिका वडा नम्बर ११ का वडा अध्यक्ष बिमलराज जोशी, नरेन्द्र थापा, केशरबहादुर गुरुङ, रेशम बहादुर गुरुङ, प्रतापसिंह अधिकारी लगायतले मन्तव्य व्यक्त गरेका थिए ।
उक्त भेलाले आगामी निर्वाचनलाई लक्षित गर्दै नेपाली कांग्रेसलगायत विभिन्न राजनीतिक दलहरूसँग निर्वाचन सहकार्यका विषयमा छलफल र संवाद अघि बढाउन हरिशरण पण्डितको संयोजकत्वमा वार्ता समिति गठन गरेको छ । गठित समितिमा सदस्यका रूपमा सुकुमलाल गुरुङ, उर्मिला थापा, दीपकराज जोशी, ऋषिराम पोखरेल, नरेन्द्र थापा र प्रताप सिंह अधिकारी रहेका छन् । भेलामा सहभागी नेताहरूले स्वतन्त्र अभियान जोशी समूहलाई थप संगठित र प्रभावकारी बनाउँदै पार्टीभित्र सकारात्मक दबाब सिर्जना गर्नुपर्ने आवश्यकता औंल्याएका थिए ।
