तनहुँ । माघ २१
नेपाली काँग्रेस तनहुँ क्षेत्र नम्बर १ का उम्मेदवार गोविन्द भट्टराईले बुधबार दमौली बजार क्षेत्रमा घरदैलो गरेका छन् । बिहान ८ बजेबाट सुरु भएको उनको घरदैलो दिनभर वडा नम्बर २, ३ र ४ का विभिन्न क्षेत्रमा भएको थियो ।
सो क्रममा भट्टराईले प्रतिनिधि सभाको निर्वाचनमा आफुलाई मतदान गर्न दमौलीबासी समक्ष अनुरोध गरे । घरदैलोको क्रममा मतदाता समक्ष भट्टराईले भने ‘मैले २०५४ सालदेखि नै भ्रष्टाचार विरुद्ध आन्दोलन गर्दै आइरहेको छु । त्यसलाई अव पनि म निरन्तरता दिईरहनेछु ।’
पछिल्लो समय तनहुँको आवाज नीति निर्माण तहमा अलिक ओझेलमा परेको महसुस जिल्लाबासीले गर्नु भएको भन्दै भट्टराईले अबको हाम्रो जिम्मेवारी तनहुँ भ्रष्टाचारमुक्त जिल्ला बनोस् र यहाँको तपाईंको आवाज नीति निर्माण तहमा पनि स्पष्टरुपमा सुनियोस् भन्ने नै रहेको बताए ।
त्यो जिम्मेवारी लिएर त्यसलाई पूर्णरुपमा निर्वाह गर्न आफु तयार रहेको भट्टराईले बताए । उनले भनेका छन् ‘हिजो, आज र भोलि कुनै पनि दिन मेरो मनमा, मस्तिष्कमा एउटै कुरा छ–तनहुँ । र, अब बदलिने तनहुँ, समुन्नत तनहुँ ।’
