तनहुँ । माघ २७
तनहुँ क्षेत्र नम्बर १ का प्रतिनिधिसभा सदस्य पदका स्वतन्त्र उम्मेदवार दीपक राज जोशी निरन्तर मतदाताको घरदैलोमा पुगिरहेका छन् । जोशीले मंगलबार बन्दीपुर, दुईपिप्ले, डुम्रे साझबोटे, नयाँबस्ती, केबलकार बेस स्टेशन तथा विमलनगर क्षेत्रमा घरदैलो गरि मतदातालाई भेट गरे ।
उक्त कार्यक्रममा जोशीले स्थानीय बासिन्दाहरूसँग प्रत्यक्ष भेटघाट गर्दै वर्तमान राजनीतिक अवस्था, सुशासनको आवश्यकता तथा तनहुँबासीले भोगिरहेका विभिन्न समस्याहरूका बारेमा विस्तृत छलफल गरेका थिए । सो क्रममा स्थानीयवासीहरूले रोजगारीको अभाव, स्वास्थ्य सेवाको पहुँच, गुणस्तरीय शिक्षा, सडक तथा यातायातको अवस्था, खानेपानी, कृषि तथा स्थानीय आर्थिक अवसरको अभाव जस्ता विषयमा गुनासा र सुझावहरू राखेका थिए ।
उम्मेदवार जोशीले जनताका समस्याहरूलाई नजिकबाट बुझ्दै समाधानमुखी नीतिगत पहल गर्ने प्रतिबद्धता व्यक्त गरे । उनले तनहुँको समग्र विकास, युवालाई रोजगारीको अवसर सिर्जना, स्थानीय स्रोत–साधनको प्रभावकारी उपयोग तथा पारदर्शी र जवाफदेही शासन प्रणालीका लागि आफू निरन्तर प्रतिबद्ध रहने बताए ।
घरदैलो कार्यक्रममार्फत जनतासँग प्रत्यक्ष संवाद गर्दै सुझाव संकलन गर्ने अभियान आगामी दिनहरूमा पनि निरन्तर जारी रहने जोशीले बताए ।
