देवघाट । माघ २७
नेपाली काँग्रेसबाट तनहुँ क्षेत्र नम्बर १ का उम्मेदवार गोविन्द भट्टराई मंगलबार देवघाट गाउँपालिका पुगेका छन् । चुनावी अभियानको क्रममा मतदातालाई भेट्न भट्टराई देवघाट पुगेका हुन् । वडा नम्बर ४ को गाईघाटबाट आफ्नो चुनावी अभियान सुरु गरेका भट्टराईले उक्त वडाको काफलडाँडा, सिन्चाङ लगायतको क्षेत्रमा प्रचार प्रसार कार्यालय उद्घाटन, घरदैलो र मतदातालाई भेटघाट गरेका थिए ।
गाईघाटमा स्थापना गरिएको वडा नम्बर ४ को निर्वाचन प्रचार कार्यालय उद्घाटन गर्दै भट्टराईले यस अघिको उपनिर्वाचनमा तनहुँ क्षेत्र नम्बर १ का मतदाताले योग्य प्रतिनिधि नछान्दा दुख पाउनु परेको बताए । तनहुँबाट निर्वाचित प्रतिनिधिले तनहुँको विकासमा एकरत्ति पनि चासो नदिँदा यहाँका जनताले दुख पाउनु परेको उनले बताए । अव विगतको गल्ती सच्याउने अवसर आएको भन्दै भट्टराईले अव फागुन २१ गते हुने निर्वाचन मार्फत जनताले विगतको गल्ती सच्याउनुपर्ने बताए ।
भट्टराईले यसअघि मैले गरेका कामहरु समाज सुधारका लागि गरेको भन्दै भट्टराईले खानेपानी, सडक, सामाजिक भवनदेखि लिएर यहाँका स्कुलहरुको स्तरोन्नतीका लागि आफुले तनहुँमा लामो समय जनताको काममा बिताएको बताए । अव भविष्यमा पनि आफ्ना योजनाहरुलाई निरन्तरता दिने उनको भनाई थियो ।
उक्त कार्यक्रममा नेपाली काँग्रेसका देवघाट गाउँ कार्य समितिका सभापती तिलबहादुर थापा लगायतका नेताहरुको उपस्थिती रहेको थियो ।
