तनहुँ । फागुन १
तनहुँ क्षेत्र नम्बर १ का स्वतन्त्र उम्मेदवार दीपक राज जोशीले शुक्रबार विभिन्न स्थानमा घरदैलो कार्यक्रम सम्पन्न गरेका छन् । उक्त कार्यक्रम अन्तर्गत व्यास नपा १३ को चर्च घर, कुकुरढुङ्गे, गुँदीफच्याङ, केशबटार, रुम्सी, नयाँगाउँ, ठिन, हर्कपुर, कुलुङ र छाबदी लगायतका क्षेत्रका स्थानीय बासिन्दासँग प्रत्यक्ष भेटघाट तथा अन्तरक्रिया गरिएको थियो ।
घरदैलोका क्रममा स्थानीय नागरिकहरूले क्षेत्रका विकास, पूर्वाधार, रोजगारी, सेवा प्रवाह लगायतका विभिन्न समस्याहरू प्रस्तुत गरेका थिए । साथै ती समस्याहरूको समाधानका सम्भावित उपायबारे खुला छलफल समेत गरिएको थियो ।
अन्तरक्रियाका क्रममा विगतमा निर्वाचित जनप्रतिनिधिहरूले अपेक्षाअनुसार काम नगरेको भन्दै स्थानीयवासीहरूले असन्तुष्टि व्यक्त गरेका थिए । जनताले अब आफ्नो दुःख–सुखमा साथ दिने, जवाफदेही र स्थानीय आवश्यकताप्रति संवेदनशील उम्मेदवारलाई समर्थन गर्नुपर्ने धारणा व्यक्त गरेका थिए ।
उक्त अवसरमा उम्मेदवार जोशीले स्थानीयवासीका सुझाव, गुनासा र अपेक्षालाई गम्भीरतापूर्वक लिँदै जनताको विश्वासलाई विकास, सुशासन र जवाफदेहितामार्फत व्यवहारमा उतार्ने प्रतिबद्धता व्यक्त गरे ।
