तनहुँ । फागुन २५
जिल्ला सुरक्षा समिति तनहुँले प्रतिनिधि सभा निर्वाचन सफल पार्न सहयोग गर्ने सबैलाई धन्यवाद दिएको छ । जिल्ला प्रशासन कार्यालयले सोमबार विज्ञप्ति प्रकाशित गरि प्रतिनिधि सभा निर्वाचनलाई शान्तिपूर्ण, मर्यादित, भयरहित, विश्वसनीय र उत्साहजनकरुपमा सम्पन्न गर्न सफल पार्नुहुने सबैमा आभार व्यक्त गरेको हो ।
प्रतिनिधि सभा सदस्य निर्वाचन, २०८२ सम्पन्न गर्न दिनरात खटिनुभएका जिल्लास्थित सुरक्षा निकायका पदाधिकारीहरु, सुरक्षा पट्रोलिङ, स्ट्राइकिङ, सूचना संकलन/मतदान केन्द्रमा खटिने सुरक्षाकर्मीहरु र निर्वाचन प्रहरीहरुले उत्कृष्ट कार्यसम्पादन गर्नु भएकोमा जिल्ला सुरक्षा समितिले धन्यवाद व्यक्त गरेको छ ।
निर्वाचन व्यवस्थापन, आचारसंहिता पालना र मतदान व्यवस्थापनमा निरन्तर खटिई महत्वपूर्ण भूमिका निर्वाह गर्नु हुने मूख्य निर्वाचन अधिकृत, निर्वाचन अधिकृत, जिल्ला निर्वाचन अधिकारी, अनुगमन अधिकृत, मतदान अधिकृत, सहायक मतदान अधिकृत, मतदान प्रकृयामा संलग्न सम्पूर्ण कर्मचारी र शिक्षकहरु, स्वयमंसेवक तथा पर्यवेक्षकहरु साथै निर्वाचन व्यवस्थापन, स्रोत साधन र जनशक्ति व्यवस्थापन गर्न सहयोग गर्नुहुने सबै जनप्रतिनिधिज्यूहरु, नियमित, तथ्यपूर्ण र विश्वसनीय सूचना प्रवाह गर्ने सम्पूर्ण सञ्चारकर्मी हरुप्रति आभार व्यक्त गरेको छ ।
साथै सबै राजनीतिक दल, उम्मेदवार, उद्यमी, व्यवसायी, नागरिक समाज, आममतदातालाई प्रतिनिधि सभा सदस्य निर्वाचन, २०८२ सम्पन्न गर्न महत्वपूर्ण योगदान गर्नुभएकोले जिल्ला सुरक्षा समिति, तनहुँका पदाधिकारीहरुको तर्फबाट कृतज्ञता व्यक्त गरिएको छ ।
प्रमुख जिल्ला अधिकारी शिवलाल तिवारी, सहायक प्रजिअ दिपक रेग्मी, प्रहरी उपरिक्षक टेकबहादुर कार्की, सशस्त्र प्रहरी उपरिक्षक श्रीराम कुँवर, प्रमुख सेनानी हरि खड्का र उप अनुसन्धान निर्देशक मनोज ढकालले हस्ताक्षर गरेको विज्ञप्तिमा प्रतिनिधि सभा सदस्य निर्वाचन, २०८२ तनहुँमा शान्तिपूर्ण, मर्यादित, भयरहित, विश्वसनीय र उत्साहजनकरुपमा सम्पन्न भएको र प्रत्यक्ष र समानुपातिक प्रणाली दुवै तर्फको मत परिणाम समेत सार्वजनिक भईसकेको छ ।
