विष्णु मगर । देवघाट, जेठ १७
देवघाट गाउँपालिका वडा नम्बर ५ निवासी प्रतिभाशाली खेलाडी कृती शाही गण्डकी प्रदेशस्तरीय अन्डर–१८ भलिबल प्रतियोगिताका लागि छनौट भएकी छन् । सानै उमेरदेखि भलिबल खेलप्रति गहिरो रुचि र लगाव राख्दै निरन्तर मेहनत गरिरहेकी शाहीको यो सफलता मेहनत, अनुशासन र संघर्षको प्रतिफलका रूपमा हेरिएको छ ।
शाहीले आफ्नो सफलताको मुख्य श्रेय कुशल प्रशिक्षक दिनेश चौधरीलाई दिएकी छन् । ‘कोच दिनेश चौधरी सरको निरन्तर साथ, प्रशिक्षण र प्रेरणाले नै आज यो स्थानसम्म पुग्न सफल भएकी हुँ’ शाहीले भनिन् ।
उनले देवघाट गाउँपालिकाले छात्रवृत्ति उपलब्ध गराउने आश्वासन दिएको भए पनि हालसम्म आफूले कुनै छात्रवृत्ति नपाएको गुनासो गरिन् । खेलाडीलाई प्रोत्साहन र सहयोग आवश्यक रहेको उल्लेख गर्दै उनले स्थानीय सरकारले खेल क्षेत्रलाई अझ प्राथमिकतामा राख्नुपर्ने धारणा व्यक्त गरिन् ।
प्रदेशस्तरमा खेल्ने अवसर पाएकी शाहीले आगामी दिनमा देशको प्रतिनिधित्व गर्दै आफ्नो गाउँ, परिवार र देशको सम्मान उच्च राख्ने प्रतिबद्धता व्यक्त गरेकी छन् । कृतीको यो उपलब्धिले देवघाट क्षेत्रका युवा खेलाडीहरूमा नयाँ ऊर्जा र प्रेरणा थपिएको स्थानीयवासीले बताएका छन् ।
