तनहुँ । जेठ २६
देवघाट स्थित त्रिशुली र कालीगण्डकीको संगम वेणीमा बनाईएका १६ टहराहरु हटाईएको छ । देवघाट गाउँपालिका वडा नम्बर ५ ले देवघाट क्षेत्र विकास समितिसँगको समन्वयमा देवघाटधामको वेणी संगममा विभिन्न संघसंस्था, जोगी, भिक्षु पण्डित तथा व्यवसायीहरूले विभिन्न प्रयोजनको लागि बनाएका उक्त टहराहरू हटाईएको हो ।
देवघाट क्षेत्र विकास समितिले वेणी संगममा निर्माण गरिएका अस्थायी टहरा हटाउन गत बैशाख अन्तिम साता निर्देशन दिएको थियो । देवघाट गाउँपालिका वडा नम्बर ५ कार्यालयले देवघाटको वेणी संगममा बनाइएका अस्थायी टहरा हटाउनकोलागि देवघाट क्षेत्र विकास समितिलाई अनुरोध गरेको थियो । वडाका विभिन्न राजनीतिक दलहरुले समेत वेणी संगममा बनाईएका टहरा हटाउनको लागि पहल गर्न वडा कार्यालयलाई अनुरोध गरेको थियो ।
देवघाट गाउँपालिकाका प्रवक्ता तथा वडा नम्बर ५ का अध्यक्ष पूर्णबहादुर कुँवरले तोकिएको समयसीमाभित्र हालसम्म १६ वटा अस्थायी टहरा पूर्ण रूपमा हटाइसकिएको बताए । वेणी संगमको स्नानघाट संरक्षणका लागि निर्माण गरिएको पर्खालभन्दा तलको सार्वजनिक जग्गामा विभिन्न सङ्घसंस्था, जोगी, भिक्षु, पण्डित तथा व्यवसायीहरूले अस्थायी टहरा निर्माण गरेका थिए।
स्थानीय राजनीतिक दल, नागरिक समाज र सरोकारवालाको गुनासो तथा धार्मिक क्षेत्रको गरिमा जोगाउने आवश्यकतालाई ध्यानमा राख्दै गाउँपालिकाको समन्वयमा टहरा हटाईएको वडा अध्यक्ष कुँवरले बताए ।
