देघवाट । साउन ११
सरकारले देवघाट क्षेत्र विकास समितिमा रिक्त रहेको अध्यक्ष र सदस्यहरु नियुक्त गरेको छ । संस्कृति, पर्यटन तथा नागरिक उड्ययन मन्त्रालयको मन्त्रीस्तरको गत साउन १ गतेको निर्णय अनुसार देवघाट क्षेत्र विकास समिति (गठन) आदेश २०५० को दफा ३ को उपदफा २ बमोजिम अध्यक्ष र सदस्यहरु २ वर्षकोलागि नियुक्त गरिएको हो ।
समितिको अध्यक्षमा देवघाट गाउँपालिका–५ निवासी भवानी प्रसाद तिमिल्सेना नियुक्त भएका छन् । तिमिल्सेना देवघाट–५ स्थित चक्रवर्ती मणिमुकुन्दसेन मन्दिर तथा आश्रमका अध्यक्ष हुन् । त्यस्तै सदस्यहरुमा देवघाट गाउँपालिका–५ का केशबहादुर गुरुङ र नरबहादुर ढुङ्गाना, भरतपुर–१ चितवनका युवराज खत्री क्षेत्री, रत्ननगर–९ चितवनका निर्मल पौडेल, देवचुली–६ नवलपुरका हरिप्रसाद पराजुली, र गैंडाकोट–८ नवलपुरका तारानाथ सुवेदी रहेका छन् ।
समितिको कार्यक्षेत्र तनहुँ, चितवन र नवलपुर जिल्ला रहेको छ । सोही अनुसार समितिमा पनि तिन वटै जिल्लाबाट प्रतिनिधित्व गराईएको छ । नवनियुक्त अध्यक्ष तथा सदस्यहरुलाई सोमबार क्षेत्र विकास समितिको कार्यालयमा पदस्थापना गराईएको छ ।
यसअघिको सरकारले नियुक्त गरेका अध्यक्ष, सदस्य तथा कार्यकारी निर्देशकलाई वर्तमान सरकारले जेठ १९ गते पदमुक्त गरेको थियो । समितिको कार्यकारी निर्देशकको जिम्मेबारी हालकोलागि मन्त्रालयका उपसचिव शोभाखर रेग्मीले सम्हालेका छन् ।
