तनहुँ । साउन १८
तनहुँ क्षेत्र नम्बर २ का प्रतिनिधि सभा सदस्य ई. श्रीराम न्यौपाने र म्याग्दे गाउँपालिकाका अध्यक्ष श्रीप्रसाद श्रेष्ठबीच गाउँपालिकाको समग्र विकास निर्माणका विषयमा महत्वपूर्ण छलफल भएको छ ।
‘जनसंवाद’ कार्यक्रमका सिलसिलामा सोमबार म्याग्दे गाउँपालिका पुगेका सांसद न्यौपानेले गाउँपालिकाको कार्यालयमै पुगेर अध्यक्ष श्रेष्ठसँग भेटघाट गरेका हुन् । भेटघाटका क्रममा सांसद न्यौपाने र अध्यक्ष श्रेष्ठबीच म्याग्दे गाउँपालिकाभित्र सञ्चालित तथा आगामी दिनमा सञ्चालन गरिने विभिन्न विकास योजनाहरूका विषयमा छलफल भएको थियो ।
सोही अवसरमा अध्यक्ष श्रेष्ठले गाउँपालिकाको तर्फबाट तयार पारिएको ‘वार्षिक विकास योजना पुस्तिका’ सांसद न्यौपानेलाई हस्तान्तरण गरेका थिए । सो क्रममा म्याग्देको समृद्धिका लागि सङ्घीय सरकार र स्थानीय सरकारबीच हुनुपर्ने समन्वयका विषयमा समेत कुराकानी भएको थियो ।
योजना पुस्तिका ग्रहण गर्दै सांसद न्यौपानेले म्याग्दे गाउँपालिकाको भौतिक तथा सामाजिक विकासका लागि आफू प्रतिबद्ध रहेको बताए । उनले स्थानीय तहका आवश्यकताहरूलाई सङ्घीय तहसम्म पु¥याउन र बजेट तथा योजना व्यवस्थापनमा गाउँपालिकासँग पूर्ण सहकार्य गरेर अगाडि बढ्ने प्रतिबद्धता जनाए ।
उक्त भेटघाट तथा छलफल कार्यक्रममा म्याग्दे गाउँपालिकाका प्रमुख प्रशासकीय अधिकृत नारायणप्रसाद अधिकारीको समेत विशेष उपस्थिति रहेको थियो । कार्यक्रममा पालिकाभित्रका चालु आयोजना, भावी रणनीति र सङ्घीय सरकारबाट सहयोग अपेक्षा गरिएका प्राथमिकता प्राप्त योजनाहरूबारे छलफल भएको प्रमुख प्रशासकीय अधिकृत अधिकारीले बताए ।
