तनहुँ । साउन १९
शुक्लागण्डकी नगरपालिका–४ दुलेगौंडास्थित पञ्चमुनिदेव माध्यमिक विद्यालयमा १ लाख ११ हजार १ सय ११ रुपैयाँको “आमा बुधमाया अक्षयकोष” स्थापना गरिएको छ ।
विद्यालयका सहायक प्रधानाध्यापक एवम् कक्षा ११/१२ संयोजक लक्ष्मण पुरी तथा उनको परिवारले स्वर्गीय आमा बुधमाया पुरीको स्वर्गारोहण भएको ४५ औँ दिनको पुण्य तिथिमा उक्त कोष स्थापना गरेका हुन् । लक्ष्मणका बुबा दामोदर पुरीसहित दाजुभाइहरू भेषराज, कृष्ण, मोहनराज र मीनराज पुरीको परिवारले संयुक्त रूपमा सो रकमको चेक मंगलबार विद्यालयका प्रधानाध्यापक विमल जोजिजुलाई हस्तान्तरण गरेका थिए ।
विद्यालयका अनुसार अक्षयकोष सञ्चालनका लागि आवश्यक कार्यविधि निर्माण गरिनेछ । सोही कार्यविधिको आधारमा कोषबाट प्राप्त हुने ब्याजबाट जेहेन्दार तथा विपन्न विद्यार्थीहरूलाई वार्षिक रूपमा छात्रवृत्ति वितरण गरिनेछ ।
आफ्नो पठनपाठन र कर्मथलो रहेको विद्यालयमा आमाको नाम जीवन्त राख्न र गरिब तथा असहाय विद्यार्थीको शिक्षामा सहयोग पु¥याउने उद्देश्यले अक्षयकोष स्थापना गरिएको पुरी परिवारले जनाएको छ ।
