तनहुँ । साउन २१
केही दिनदेखिको लगातार वर्षाका कारण तनहुँको व्यास नपा १४ मा पर्ने मास्दीघाट क्षेत्रमा पहिरो जाँदा बुद्धसिंह मार्ग पूर्ण रूपमा अवरुद्ध भएको छ । बुधबारदेखि सडक ठप्प हुँदा दैनिक आवतजावत गर्ने सर्वसाधारण, बिरामी, वृद्धवृद्धा तथा विद्यालय जाने बालबालिका गम्भीर समस्यामा परेका छन् ।
स्थानीय सेतीगंगा आधारभूत विद्यालयका प्रधानाध्यापक सिद्धान्त गर्जामगरका अनुसार मास्दीघाटका साथै ढाप लगायतका अन्य स्थानमा पनि पहिरो खसेको छ । पहिरोका कारण बन्दीपुर गाउँपालिका–६ खहरे, देवघाट र आँबुखैरेनी गाउँपालिकाका केही वडाका स्थानीय बासिन्दाको जनजीवन प्रभावित भएको छ ।
सडक खुलाउ डोजरको प्रयोग गरी पहिरो हटाउने काम भइरहेको छ । बुधबार बिहान स्थानीयवासीले ढुंगा–माटो पन्छाएर पैदल यात्रु हिँडडुल गर्न सक्नेसम्मको बाटो बनाएका छन् । पहिरोको कारण बन्दीपुर, देवघाट र आँबुखैरेनी गाउँपालिकाका हजारौँ नागरिक सडक अवरुद्ध हुँदा मारमा परेका छन् ।
गण्डकी प्रदेशको गौरवको आयोजना मानिने यो मार्गले तनहुँको सदरमुकाम दमौलीलाई चितवनको घुमाउनेसँग जोड्छ । तराईका जिल्लासँग जोड्ने यो सबैभन्दा छोटो वैकल्पिक सडक हो । घुमाउनेमा पक्की पुल निर्माण भएपछि यो मार्ग हुँदै यात्रा गर्दा पृथ्वी राजमार्गको मुग्लिन–नारायणगढ खण्डको तुलनामा करिब २५ किलोमिटर दुरी छोटो हुनेछ । यद्यपी घुमाउनेको निर्माणाधिन पुलको भविष्य अन्यौलमा परेको छ । घुमाउनकोे साटो त्यही नजिकै कतै बैकिल्पक स्थानमा पक्की पुल बनाउने विषयमा सडक विभागले परामर्श गरिरहेको छ ।
हरेक वर्ष वर्षायाममा पहिरोका कारण सडक अवरुद्ध हुने गरेको भन्दै स्थानीयले यसको दीर्घकालीन समाधानको माग गरेका छन् ।
