तनहुँ । भदौ ११
जिल्ला प्रशासन कार्यालय तनहुँले बाढी तथा विपद् प्रभावितका नाममा आफूखुशी आर्थिक सहयोग संकलन नगर्न र नगराउन सर्वसाधारण एवं विभिन्न संघ–संस्थाहरूलाई आग्रह गरेको छ । बुधबार रसुवाको भोटेकोशी नदीमा आएको भिषण बाढीका कारण भोटेकोशी र त्रिशुली नदी किनारमा ठूलो मानवीय तथा भौतिक क्षति भएको थियो ।
हाल घाइते तथा अलपत्र परेकाहरूको खोज, उद्धार र राहत वितरणको कार्य जारी रहेको प्रशासनले जनाएको छ । तर, यो महाविपत्तिको घडीमा केही व्यक्ति, समूह र संस्थाहरूले बाढी प्रभावितहरूको सहायताका नाममा आफूखुशी आर्थिक सहयोग संकलन गर्न थालेको र कतिपयले रकम उठाउन क्युआर समेत सेयर गरिरहेको गुनासो आएपछि प्रशासनले यस्तो अनुरोध गरेको हो ।
जिल्ला प्रशासन कार्यालयले सूचना प्रकाशित गरी बाढी प्रभावितको नाममा जथाभावी रकम संकलन नगर्न/नगराउन र नेपाल सरकारले तोकेको आधिकारिक प्रधानमन्त्री दैवी प्रकोप उद्धार कोष र प्रधानमन्त्री राहत कोष बाहेक कुनै पनि अन्य संस्था वा व्यक्तिलाई रकम उपलब्ध नगराउन आग्रह गरेको छ । सरकारले तोकेको आधिकारिक कोषमा सहयोग गर्न चाहनेहरूका लागि विभिन्न बैंकका खाता नम्बरहरू समेत सार्वजनिक गरिएको छ ।
नेपाल सरकारद्वारा तोकिएका आधिकारिक बैंक खाता विवरणहरूमा हिमालयन बैंक लिमिटेड (खाता नम्बर ०१९०५६३१२१००४६२), स्ट्यान्डर्ड चार्टर्ड बैंक नेपाल (खाता नम्बर ०१०१३२४३८०१/०२०१३२४३८०१३) राष्ट्रिय वाणिज्य बैंक (खाता नम्बर ११३०१००००३७६२००१/११३०१०००००००६००६४), एभरेस्ट बैंक लिमिटेड (खाता नम्बर ००१००१०५२००२७०/००१०११०२२०००१२५), नेपाल बैंक लिमिटेड (खाता नम्बर ००२११६००५१००३९०००००३/००२००१००५१००३९०००००१६), ग्लोबल आइएमई बैंक (खाता नम्बर ००४०१०१००००००५७/००४११०१०००००००५७), नबिल बैंक (खाता नम्बर १७१००१७५०५२८५८), कृषि विकास बैंक (खाता नम्बर ०१००२०१००२९०७०१४९), राष्ट्रिय वाणिज्य बैंक कोष (खाता नम्बर १४३०१०००००२५००६/१४३०१०००००११६४००१) रहेको छ ।
प्रशासनले विपद्को यो कठिन परिस्थितिमा गैरकानुनी वा अनधिकृत रूपमा रकम संकलन गर्ने कार्यलाई रोक्दै आधिकारिक माध्यमबाट मात्र सहयोग आदानप्रदान गर्न सम्बद्ध सबैमा अपिल गरेको छ ।
