तनहुँ । भदौ १६
होटेल ब्यबसायी संघ तनहुँले रसुवा बाढी पीडितका लागि प्रधानमन्त्री दैबी प्रकोप उद्धार कोषमा ३८ हजार एक सय १० रुपैयाँ सहयोग गरेको छ । संघले मंगलबार राष्ट्रिय बाणिज्य बैंक मार्फत उक्त सहयोग रकम जम्मा गरेका हुन् ।
यसैविच होटल व्यवसायी संघ तनहुँले बाढीपहिरोमा बेपत्ता तथा मृत्यु भएकाहरूका आफन्त शव खोज्न वा बुझ्न आउने क्रममा निःशुल्क खाना र बस्ने व्यवस्था गर्ने निर्णय गरेको छ । संघका अध्यक्ष गिरीबहादुर थापाका अनुसार कोत्रेदेखि मुग्लिनसम्म सञ्चालित होटल व्यवसायीहरूले पीडितको संख्या र आवश्यकताका आधारमा निशुल्क गास र बासको व्यवस्था गर्नेछन् ।
संघले ग्यासको अभावका कारण होटल व्यवसाय सञ्चालनमा समस्या भएको भन्दै प्रमुख जिल्ला अधिकारीको ध्यानाकर्षण गराएको छ । विपद्को समयमा व्यवसायसँगै सेवाको कामसमेत गरिरहेको भन्दै संघले व्यवसाय सञ्चालनका लागि ग्यासको आपूर्ति सहज बनाउन प्रशासनसँग आग्रह गरेको छ ।
