११ जेठ, देवघाट
देवघाट गाउँपालिका–५ स्थित देवघाट टोल सुधार समितिले सामाजिक दुरी कायम गर्दै संस्थाको भवन निर्माणको काम सुरु गरेको छ । स्थानीय स्तरकै निर्माणकर्मी प्रयोग गरि संस्थाले भवन निर्माणको काम सुरु गरेको संस्थाका अध्यक्ष शुकु गुरुङले बताए ।
भवन निर्माणकोलागि प्रतिनिधि सभाका सांसद कृष्णकुमार श्रेष्ठ किसानले सांसद क्षेत्र विकास कोष अन्तर्गतको स्थानीय पुर्वाधार विकास कार्यक्रम मार्फत १० लाख रुपीयाँ उपलब्ध गराएका थिए । त्यसैगरि २ लाख रुपीयाँ टोलबासीबाट संकलन गरि १२ लाखको लागतमा सो भवन निर्माण सुरु गरिएको अध्यक्ष गुरुङले बताए । भवनको गाह्रो उठाएर टिन छाउने काम यही जेठ मसान्त सम्म सक्ने योजना रहेको र बाँकी फिनिसिङको काम भने आगामी आर्थिक वर्षमा थप रकम जुटाएर गरिने गुरुङले जानकारी दिए । सभाहलको रुपमा रहने सो भवनमा ९० जनाको क्षमता रहेको छ ।
स्थानीय निर्माणकर्मी र मजदुरको प्रयोग गरि निर्माणको काम गर्ने र यस अघि सम्झौता भईसकेका साना योजनाहरु यही आर्थिक वर्षमा नै सम्पन्न गर्ने गाउँपालिकाले निर्णय गरेको वडा नम्बर ५ का अध्यक्ष एवं गाउँपालिकाका प्रवक्ता यालबहादुर गुरुङले बताए । सोही निर्णय अनुसार थोरै रकमका साना योजनाहरु धमाधम भईरहेको उनले बताए ।
