दमौली, कार्तिक २०
ग्रामीण भु-भागलाई पक्की सडकसँग जोडेर त्यहाँका थप सम्भावना समेट्दै समृद्ध गाउँ निर्माण गर्ने लक्ष्य सहित बाग्मती, गण्डकी र लुम्बिनी प्रपेश जोड्ने जोडिएको चितवनको गाइघाट देखि तनहुँको दक्षिणी ग्रामीण देवघाट, ऋषिङ र घिरिङ गाउँपालिका हुदै स्याङ्जाको गल्याङ हुँदै पाल्पाको आर्यभन्ज्याङ जोड्ने सडकको तनहुँ खण्डको काम तत्काल शुरु गर्नका लागि तनहुँका जनप्रतिनिधि सहितको टोलीले प्रधानमन्त्रीको ध्यानाकर्षण गराएको छ ।
सोमबार घिरिङ गाउँपालिकाका अध्यक्ष होमबहादुर थापा सहित सर्वदलीय प्रतिनिधि सहितको टोली र पुर्वमन्त्री तथा प्रतिनिधिसभा तनहुँ क्षेत्र नम्बर २ का सांसद शंकर भण्डारी तथा निवर्तमान सांसद केदार सिग्देल सहितको टोलिले सोमबार प्रधानमन्त्री पुष्पकमल दाहाल प्रचण्ड, अर्थमन्त्री डा. प्रकाश शरण महत लगायतसँग भेट गरेको थियो ।
सो भेटमा प्रधानमन्त्री दाहाल र अर्थमन्त्री महत दुवैले उपभोक्ता र राजनितिक दलहरुले चिन्ता प्रकट गरे बमोजिम नै काम पूरा गर्न गराउन सम्पुर्ण सहयोग गर्ने प्रतिबद्धता जनाएका थिए ।
गाइघाट – गल्याङ – आर्यभन्ज्याङ सडक अन्तर्गतको तनहुँ खण्डको काम छिट्टै सम्पन्न गरि ग्रामीण जनतालाई राजमार्गसँग जोड्ने संकल्प पूरा हुने घिरिङ गाउँपालिकाका अध्यक्ष थापाले विश्वास व्यक्त गरेका छन् ।
