दमौली, चैत २७
पोखरामा मंगलबारदेखी सुरु भएको अन्तराष्ट्रिय कृषि जैविक विविधता सम्मेलनमा तनहुँको भानु नपा–९ स्थित जैविक विविधता संरक्षण समिति पुर्काेट सामुदायिक विउ बैंकले रैथाने बालिका विभिन्न प्रकारका १६५ जातका बिउहरु प्रर्दशनीमा राखेको छ ।
उक्त सम्मेलनमा पुर्काेट सामुदायिक विउ बैंकले खाद्य बाली, फलफुल, अन्नबाली, तेल हन, दल हन, जरे बाली, मसला बाली, जडिबुटी र वन पैदावरका १६५ जातीका बिउ प्रर्दशनीमा राखेको सामुदायिक विउ बैंक पुर्काेटका संस्थापक एवं सामुदायिक विउ बैंकका पुर्व केन्द्रिय अध्यक्ष सिताराम बजगाईले बताए ।
विश्व खाद्य संगठनको आयोजना तथा नेपाल सरकार र लिबर्डको व्यवस्थापनमा भएको उक्त सम्मेलनको कृषि मन्त्री ज्वालाकुमारी साह र वन तथा वातावरण मन्त्री नवल किशोर साहले संयुक्त रुपमा उद्घाटन गरेका थिए ।
सम्मेलनमा नेपालका तनहुँको पुर्काेट सामुदायिक विउ बैंक सहित नवलपुर, बारा र डोटी जिल्ला र विश्वका २४ देशको प्रतिनिधित्व रहेको छ । उक्त सम्मेलनमा सहभागी विभिन्न देशहरुले पनि आ आफ्नो देशको रैथाने बाली तथा विविधिकरण गरिएका विभिन्न बस्तुहरुको प्रर्दशनी गरेका छन् ।
चैत ३० गतेसम्म चल्ने उक्त अन्तराष्ट्रिय सम्मेलनमा विश्वभरबाट लोप हुँदै गईरहेको रैथाने बालीको संरक्षण गर्ने बारेमा चिन्तन मनन हुने र सम्बन्धित देशका सरकारहरुलाई यसबारेमा ध्यानाकर्षण गराईने बजगाईले बताए ।
