देवघाट, असार १
देवघाट गाउँपालिकाका सामुदायिक विद्यालयमा हामी सुधार्छौं हाम्रो विद्यालय भन्ने अभियान सुरु भएको छ । गुणस्तरीय शिक्षाका लागि विद्यालयमा सुशासन, जिम्मेवार र सक्षम व्यवस्थापन भन्ने मूल नाराका साथ सामुदायिक विद्यालय व्यवस्थापन समिति महासंघ नेपाल देवघाट गाउँपालिका समितिको आयोजनामा उक्त अभियान अन्तर्गत शुक्रबार देवघाट–५ स्थित कालिका माविमा अन्तरक्रिया कार्यक्रमको आयोजना गरियो ।
सामुदायिक विद्यालय व्यवस्थापन समिति महासंघ नेपाल देवघाट गाउँपालिका समितिका अध्यक्ष डा.सुरेन्द्र प्रसाद श्रेष्ठको अध्यक्षतामा आयोजित कार्यक्रममा देवघाट गाउँपालिकाका अध्यक्ष तिल बहादुर थापा, उपाध्यक्ष भुवन सिंह गुरुङ, वडा नम्बर ५ का वडा सदस्य बुद्धिबहादुर पाण्डे, सामुदायिक विद्यालय व्यवस्थापन समिति महासंघ नेपाल तनहुँका अध्यक्ष विष्णुक्त न्यौपाने, देवघाट गाउँपालिका शिक्षा तथा खेलकुँद शाखा प्रमुख होमनाथ लामिछाने, गाउँपालिका शिक्षा शाखाकी शुभद्रा भट्टराई लगायतले सामुदायिक विद्यालयमा सरकारको धेरै लगानी रहेको हुँदा लगानी अनुसारको गुणस्तर कायम गर्नुपर्नेमा जोड दिएका थिए ।
सो कार्यक्रममा सामुदायिक विद्यालयको शैक्षिक गुणस्तर सुधार्न सकिने उपायहरुको बारेमा छलफल गरिएको थियो । विद्यालयको जिर्ण भौतिक पुर्वाधार, खानेपानी, सौचालय, प्राथामिक स्वास्थ्य उपचार, खेल मैदानको अभाव, सामुदायिक विद्यालयमा राजनीतिक हस्तक्षेप, पुस्तकालयको अभाव, अभिभावक, विद्यालय प्रशासन र व्यवस्थापन समिति विच तालमेल नहुनु, स्थानीय तहबाट प्रभावकारी अनुगमनको अभाव लगायतका विभिन्न कारणहरु सामुदायिक विद्यालयको गुणस्तर अभिबृद्धीमा अवरोध देखिएको बारेमा सहभागीहरुको जोड थियो ।
सो कार्यक्रमको सन्चालन सामुदायिक विद्यालय व्यवस्थापन समिति महासंघ नेपाल देवघाट गाउँपालिका समितिकी सचिव एलिजा अधिकारी क्षेत्रीले र स्वागत मन्तव्य उपाध्यक्ष नर बहादुर गुरुङले गरेका थिए । सो कार्यक्रममा देवघाट गाउँपालिकाका विभिन्न सामुदायिक विद्यालयका व्यवस्थापन समितिका पदाधिकारीहरुको सहभागिता रहेको थियो ।
