देवघाट, माघ ६
देवघाट गाँउपालीकाको नेतृत्वमा आइतबार देवघाट गाउँपालिका–५ स्थित वेणी संगगममा सरसफाई गरिएको छ । देवघाट क्षेत्र विकास समिति, इलाका प्रहरी कार्यालय देवघाट तथा देवघाटधाम जेसिज लगायतका संघ संस्थाको सहभागितामा आइतबार दिउँसो वेणी संगम वरपर सरसफाई गरिएको हो ।
सरसफाईको नेतृत्व देवघाट गाउँपालिकाका अध्यक्ष तिलबहादुर थापाले गरेका थिए । उक्त कार्यक्रममा देवघाट क्षेत्र विकास समितिका पुर्व अध्यक्ष शिवराज पौडेल, गाउँपालिकाका अन्य जनप्रतिनिधि र कर्मचारीहरु, क्षेत्र विकास समितिका पदाधिकारीहरु, इलाका प्रहरी कार्यालयका प्रमुख तथा अन्य प्रहरी कर्मचारीहरु, देवघाटधाम जेसिजका अध्यक्ष प्रशन्न ढकाल लगायतका पदाधिकारीहरु एवं देवघाट महा–महामहोत्सवका स्वयंसेवकहरुको सहभागिता रहेको थियो ।
उक्त क्रममा मकर मेलामा आएका भक्तजनहरुबाट उत्सर्जन भएका फोहोरहरु संकलन गरि व्यवस्थापन गरिएको देवघाट गाउँपालिकाका कार्यक्रम अधिकृत कृष्णराज पन्तले बताए ।
