तनहुँ । जेठ ११
आँबुखैरेनी गाउँपालिकाले प्रधानमन्त्री रोजगार कार्यक्रम अन्तर्गत बाँस तथा फलामजन्य उद्योगमा कार्यरत श्रमिकलाई सम्मान गरेको छ । ‘श्रमको सम्मान, राष्ट्रको अभियान’ कार्यक्रम अन्तर्गत श्रमिकहरुलाई सम्मान गरेको हो ।
गाउँपालिका अध्यक्ष शुक्र चुमानको अध्यक्षतामा सम्पन्न कार्यक्रममा औद्योगिक ग्राममा कार्यरत बाँसजन्य तथा फलामजन्य उद्योगमा संलग्न श्रमिकहरूलाई सम्मान गरिएको थियो । श्रमिकहरूको योगदानलाई कदर गर्दै कार्यक्रममार्फत उनीहरूलाई प्रशंसा पत्र प्रदान गरिएको थियो ।
कार्यक्रममा गाउँपालिका उपाध्यक्ष दुर्गा अर्याल, प्रमुख प्रशासकीय अधिकृत विष्णु प्रसाद शर्मा, प्रवक्ता तथा वडा नम्बर १ का वडा अध्यक्ष प्रेम बहादुर तमु लगायत जनप्रतिनिधि तथा सरोकारवालाहरूको उपस्थिति रहेको थियो ।
आगामी दिनमा पनि श्रमिकहरूको हक, अधिकार तथा सम्मानको पक्षमा यस्ता कार्यक्रम सञ्चालन गर्ने अध्यक्ष चुमानले बताए ।
