तनहुँ । साउन १३
म्याग्दे गाउँपालिकाले संघीय मामिला तथा सामान्य प्रशासन मन्त्री भगवती न्यौपानेलाई बधाई तथा शुभकामना व्यक्त गरेको छ । गाउँपालिकाका अध्यक्ष श्रीप्रसाद श्रेष्ठको नेतृत्वमा मंगलबार गएको टोलीले सामान्य प्रशासन मन्त्रालयमा मन्त्री न्यौपानेलाई बधाई तथा शुभकामना व्यक्त गरेको हो ।
उक्त अवसरमा मन्त्री न्यौपाने समक्ष म्याग्दे गाउँपालिकाको टोलीले कार्यसम्पादनको क्रममा कर्मचारीको अभाव, विभिन्न ऐनको कारण काममा अप्ठ्यारो परेको सम्बन्धी गुनसो तथा संघीय निजामती ऐनको बारेमा छलफल भएको मन्त्रीको सचिवालयले जनाएको छ ।
उक्त भेटमा मन्त्री न्यौपानेले म्याग्दे गाउँपालिकाको समग्र विकासकोलागि गाउँपालिकासँग हातेमालो गरेर काम गर्ने बताईन् ।
उक्त भेटमा गाउँपालिकाका उपाध्यक्ष बालकृष्ण घिमिरे, प्रमुख प्रशासकीय अधिकृत नारायणप्रसाद अधिकारी, स्वास्थ्य शाखाका प्रमुख तिलकराज घिमिरे र थर्पु आधारभुत अस्पतालकी जनस्वास्थ्य निरिक्षक सक्षम घिमिरेको सहभागिता रहेको थियो ।
