तनहुँ । साउन १३
जिल्ला प्रशासन कार्यालय तनहुँमा एक वर्षको अवधिका १ हजार ४६७ गुनासो दर्ता भएको छ । आर्थिक वर्ष २०८१÷०८२ मा नागरिकहरुले विभिन्न माध्यमबाट १४६७ वटा गुनासो दर्ता गरेका छन् ।
जसमध्ये सबैभन्दा धेरै गुनासो नागरिक एप मार्फत आएको छ । नागरिक एप मार्फत ११ सय वटा, विभिन्न माध्यम मार्फत २१८, निबेदन मार्फत १२२, क्युआर कोड मार्फत १४ र हेल्लो सरकार मार्फत १३ वटा गुनासो दर्ता भएको प्रमुख जिल्ला अधिकारी रामकृष्ण अधिकारीले जानकारी दिए । ति सबै गुनासाहरु सम्बोधन गरिएको प्रजिअ अधिकारीले बताए ।
कार्यालय प्राप्त भएका सबै गुनासोको सम्बोधन गरिएको भन्दै प्रजिअ अधिकारीले भने ‘सेवाग्राहीलाई सूशासनको प्रत्याभूति होस् भनेर गुनासोको तुरुन्त सम्बोधन गरेर फर्छयौट गरेका छौं ।’ सेवाग्राहीलाई सरल र सहज ढंगले सेवा प्रवाह गरिरहेको भन्दै प्रजिअ अधिकारीले जनतालाई सुशासनको प्रत्याभूति दिलाउन कर्मचारीलाई अतिरिक्त समयमा काम गर्न लगाईएको बताए ।
कार्यालयमा भिड बढी भएको समयमा विहान ७ बजे देखि नै सञ्चालन गरि सेवा प्रदान गरिएको उनले बताए । कार्यालय साँघुरो भएकोले सेवाग्राहीहरु कार्यालयको सिंढीमा र पेटीमा बस्न बाध्य भएकोले तनहुँ जलविद्युत अयोजनाको सहयोगमा सेवाग्राहीलाई पालो पर्खने स्थानको व्यवस्था मिलाउन लागिएको उनले जानकारी दिए ।
