तनहुँ । माघ २५
तनहुँ क्षेत्र नम्बर १ अन्तर्गत भानु नगरपालिकाका बासिन्दाले उपनिर्वाचनबाट विजयी सांसद गाउँ नफर्किएको भन्दै असन्तुष्टि व्यक्त गरेका छन् । जनप्रतिनिधि निर्वाचित भएपछि जनतासँग सम्पर्कविहीन भएको गुनासो स्थानीयले गरेका हुन् । मतदातालाई भेट्न नेपाली काँग्रेसका उम्मेदवार गोविन्द भट्टराई गाउँ पुग्दा गाउँलेहरुले यस अघि जिताएर पठाएको सांसद एक पटक पनि गाउँ फर्केर नआएको बताए ।
भानु नगरपालिका–४ स्थित आमा समूहकी अध्यक्ष सरला अधिकारीले २०८० वैशाख १० गते सम्पन्न उपनिर्वाचनबाट निर्वाचित सांसद डा. स्वर्णीम वाग्ले हालसम्म एक पटक पनि गाउँ नआएको बताइन् । उनले निर्वाचित जनप्रतिनिधिले मतदाताको भावना बुझ्दै नियमित रूपमा गाउँमा उपस्थित हुनुपर्ने बताइन् ।
‘पहिलेका उम्मेदवारजस्तै जितेर गएपछि गाउँ नफर्किने प्रवृत्ति दोहोरियो’ उनले भनिन् ‘यसपटक मतदाताले सोचविचार गरेर सही प्रतिनिधि छान्नेछन् ।’ भानु–६ का एक स्थानीयका अनुसार गाउँका मुख्य समस्या खानेपानी, विद्युत्, सडक, शिक्षा र स्वास्थ्यसँग सम्बन्धित छन् । तर यी समस्याको समाधानका लागि पहल नदेखिएको उनीहरूको भनाइ छ । ‘जनप्रतिनिधिले नीति बनाउने मात्रै काम हो, बजेट ल्याउने काम होइन भन्ने अभिव्यक्ति सुन्दा निराश भएका छौँ,’ उनले भने । यस अघि उपचुनावबाट बिजयी भएका सांसद ११० पटक जिल्ला आएको भनेर सुनाएपनि आफ्नो गाउँमा भने एक पटक पनि फर्केर नआएको गाउँलेहरुले बताए ।
स्थानीय अगुवा विष्णुमाया श्रेष्ठले अवसर दिने पार्टीप्रति मतदाताको भरोसा बढ्दै गएको बताइन् । उनका अनुसार अब मतदाता विकास र जनसम्पर्कमा सक्रिय उम्मेदवारतर्फ आकर्षित भइरहेका छन् ।
त्यस्तै स्थानीय मञ्जु श्रेष्ठले अन्य उम्मेदवारको तुलनामा नेपाली कांग्रेसका उम्मेदवार गोविन्द भट्टराई इमान्दार, सरल र विकासप्रेमी नेताका रूपमा चिनिएको बताइन् । सामाजिक सञ्जालमा पनि उहाँप्रति नकारात्मक टिप्पणी कम देखिएको उनको भनाइ छ ।
आगामी निर्वाचन नजिकिँदै जाँदा भानु क्षेत्रका मतदाताले यसपटक गाउँसँग जोडिएर काम गर्ने र जनताका समस्यामा प्रत्यक्ष चासो राख्ने प्रतिनिधि चयन गर्नुपर्नेमा जोड दिएका छन् ।
