माधव सिग्देल, भिमाद नपा–१
अन्यत्रैबाट तनहुँ क्षेत्र नम्बर २ मा उम्मेदवार बन्न आउनु भएका श्रीराम न्यौपानेजीले २/४ दिनअघि प्रचार–प्रसारकै सिलसिलामा आयोजित एक कार्यक्रममा लब्धप्रतिष्ठित प्राज्ञ तथा कुटनीतिज्ञ समेतलाई साक्षी राखी भन्नुभएको सुनियो, ‘मलाई अब पैसा कमाउनु छैन, त्यो पुग्यो, अब इज्जत, मान, प्रतिष्ठा कमाउनु छ । त्यसकै लागि राजनीतिमा प्रवेश गरी निर्वाचन लड्न आएको हुँ ।’
भनाइको भाव र सार जस्ताकोतस्तै छ । वाइमात्रा तलमाथि परेको पाउनुभए माफ गरिदिनु होला । निष्ठाको राजनीति जेसुकै नाम र रुपको वैयक्तिक लाभ वा प्राप्तिको विरोधमा हुन्छ । एउटा सच्चा जनप्रतिनिधि विना कुनै लोभ–लालषा जनताको सेवामा सदा समर्पित रहनुपर्ने विश्वास गरिन्छ । जोसुकै जनप्रतिनिधिका निम्ति यो एक न्युनतम आधारभूत योग्यता हो । फगत कुनै व्यक्ति–विशेषका अतृप्त मनोकांक्षा र तुष्टी परिपूर्तिको माध्यम हो र राजनीति ? श्रीरामजीको वैयक्तिक इज्जत, मान, प्रतिष्ठासँग मतदाताको कुनै साइनो र सरोकार रहन्छ र ? के तनहुँ क्षेत्र नम्बर २ का जनता तथा मतदाता श्रीरामजीको महात्वाकांक्षाका निजी कमारा हुन् ?
हो, श्रीरामजी त अगस्ती व्यक्तिगत स्वार्थपुर्तिका लागि निर्वाचनमा आउनुभएको रहेछ जो उहाँको मुखारविन्दबाटै सुन्न पाइयो, ढाँट्नु भएन, यसका निम्ति धन्यवाद ! तर, सिंगो राजनीति र निर्वाचनको गरिमा एवं तनहुँ–२ का सार्वभौम स्वाभिमानी आम जनता र मतदाताको हुर्मत लिने छुट यहाँलाई छैन । एक साक्षर नेपाली नागरिक र सम्बन्धित क्षेत्रको रैथाने बासिन्दा एवं मतदाता हुनुको नाताले महाशयको लज्जास्पद अशोभनीय सार्वजनिक अभिव्यक्तिप्रति खेद व्यक्त गर्दछु ! कृपया ती शब्द फिर्ता लिनोस् !! पुरा भनाइको आशय त्यस्तो होइन भने समयमै क्षमायाचनाका लागि गम्भीर ध्यानाकर्षण होस् भन्ने सदिच्छासमेत राख्दछु !!!
