तनहुँ । फागुन ७
तनहुँ क्षेत्र नम्बर १ का नेपाली कांग्रेसका उम्मेदवार गोविन्द भट्टराईले राष्ट्रिय स्वतन्त्र पार्टीका उम्मेदवार स्वर्णिम वाग्लेलाई १० देखी १२ हजार मतले हराउने दाबी गरेका छन् । आफ्नो चुनावी अभियान निकै उत्साहपुर्ण र प्रभावकारी भएको भन्दै भट्टराईले यसपटक १० देखी १२ हजारको मतातन्तरमा चुनाव जित्ने दाबी गरेका हुन् ।
२०८० मा भएको उपनिर्वाचनमा भट्टराई वाग्लेसँग १४ हजार ७९७ मतान्तरले पराजित भएका थिए । उपनिर्वाचनमा रास्वपाका वाग्लेले ३४ हजार ९१९ मत प्राप्त गरि बिजयी भएका थिए भने नेपाली काँग्रेसका भट्टराईले २० हजार १२२ र नेकपा एमालेका सर्वेन्द्र खनालले ८ हजार ४८८ मत पाएका थिए ।
भट्टराईले यसपटकको उपनिर्वाचनको परिणाम उल्ट्याउने दाबी गरे । ‘तनहुँ मेरो माटो हो, म खेलेबढेको ठाउँ हो–तनहुँको माटोको सुगन्ध र तनहुँवासीको स्नेहको नतिजा हामीले २१ फागुनपछि थाहा पाउनेछौँ’ भट्टराईले भने ‘मेरो जित निश्चित भएको अहिले हामीसँग भएका आँकडाले देखाएको छ । यस पटक हामीले कम्तीमा पनि १० देखि १२ हजार मतान्तरले जित निकाल्ने छौँ ।’
अर्थशास्त्रमा पिएचडी गरिरहेका र इमानदार नेताको छवि बनाएका भट्टराईले यसअघि कुनै पदमा नहुँदा पनि ६० भन्दा बढी खानेपानी परियोजनाका काम गरेको श्रेय पाएका छन् । तनहुँका विकट गाउँहरूमा सडक पु¥याउने तथा खानेपानीका योजनामा लामो समय काम गरेकाले उनलाई तनहुँमा कतिपयले ‘पानी मान्छे’ समेत भन्छन् ।
‘विशेषगरी तनहुँ क्षेत्र नम्बर १ मा मतदाताहरूले परिवर्तन चाहनु भएको छ र त्यो परिवर्तन बदलिएको र परिवर्तित कांग्रेसबाट सम्भव हुन्छ भन्ने विश्वास उहाँहरूमा मैले पाएको छु ।’ भट्टराईले भने ‘देश समुन्नत बनाउने संकल्पसहित कांग्रेसमा नेतृत्व परिवर्तन भएसँगै देशभर र विशेषगरि तनहुँमा कांग्रेसप्रतिको आस्था र विश्वास थप बढेको मैले पाएको छु ।’
‘मसँग तनहुँका जनतासँग सँगै बसेर खाना खाने, खाजा खाने र सँगसँगै बाटोमा हिँड्नका लागि कुनै समस्या छैन । म यही माटोमा जन्मिएँ, यही माटोमा हुर्किएँ र यही माटोको समुन्नतिलाई मात्र सोचिरहेको छु ।’ भट्टराईले भने ‘त्यसैले म घरघरमा मतदातासम्म पुगेर आफ्ना कुरा राख्दै छु । त्यस्तो विशेष रणनीति बनाएर आफूलाई ग्ल्यामराइज गर्ने पक्षमा म छैन । म जे छु, जस्तो छु, त्यसरी नै तनहुँवासीसँग घुलमिल भएर अगाडि बढ्न चाहन्छु ।’
आफुले डिजिटल माध्यमबाट मतदातासँग सुझाव संकलन गरिरहेको भन्दै उनले अब प्रविधिको प्रयोग गरेर अगाडि बढ्नुको विकल्प नभएको बताए । ‘मलाई तनहुँका झन्डै २० हजार मतदाताले अहिलेसम्म सुझाव दिइसक्नु भएको छ । मेरो डिजिटल टिमले त्यसलाई अध्ययन गर्दै छ, र प्रारम्भिक रूपमा यहाँका मतदाताले यहाँको माटोको विषय उठाउनु भएको छ ।’
भट्टराईले भने ‘कतिपयले मलाई यहाँका विकासका विषयमा आफ्ना माग राख्नु भएको छ । र, सुझाव संकलनमा नै धेरैले मलाई विश्वास दिलाउनु भएको छ–यस पटक उहाँहरूको रोजाइमा यहाँको माटो चिनेको, हिजो गरेको कामलाई आधार बनाएर मलाई मत दिनु हुनेछ । यो हार्दिकताका लागि म उहाँहरू सबैलाई धन्यवाद दिन चाहन्छु । उहाँहरूले उठाउनु भएका मागलाई लिएर अगाडि बढ्नेछु, मैले उहाँहरूका मागलाई एक एक गरेर पूरा गर्ने विश्वास पनि दिलाउन चाहन्छु ।’
