तनहुँ । जेठ १८
तनहुँको म्याग्दे गाउँपालिका र गुल्मीको चन्द्रकोट गाउँपालिका विच पालिकाको असल अभ्यास सम्बन्धि अनुभव आदान प्रदान कार्यक्रम सोमबार सम्पन्न भएको छ ।
चन्द्रकोट गाउँपालिकाका अध्यक्ष युवराज खत्री क्षेत्रीको नेतृत्वमा आएको टोलीले सोमबार म्याग्दे गाउँपालिकामा गई गाउँपालिकाका अध्यक्ष श्रीप्रसाद श्रेष्ठ, उपाध्यक्ष बालकृष्ण घिमिरे, प्रमुख प्रशासकीय अधिकृत नारायणप्रसाद अधिकारी लगायतसँग भेट गरेको थियो ।
उक्त भेटमा दुई पालिकाले स्थानीय सरकार सन्चालनको क्रममा अपनाएको असल अभ्यासको बारेमा छलफल भएको थियो । साथै आगामी दिनमा दुई स्थानीय सरकारको विचमा हुनसक्ने सहकार्यको आधार, सेवा प्रवाह तथा सुशासनमा सुधारका उपायहरुको बारेमा पनि छलफल भएको बताईएको छ ।
उक्त छलफलमा स्थानीय शासन सञ्चालनका सफल अभ्यास, नवप्रवर्तन, सेवा प्रवाह सुधारका उपाय तथा विकास व्यवस्थापन सम्बन्धी अनुभवहरू साझा गरी एकअर्काबाट सिक्ने, क्षमता अभिवृद्धि गर्ने र स्थानीय सरकारबीच सहकार्य सुदृढ गर्ने बारेमा पनि छलफल भएको म्याग्दे गाउँपालिकाका प्रमुख प्रशासकीय अधिकृत नारायणप्रसाद अधिकारीले जानकारी दिए ।
उक्त भेटमा चन्द्रकोट गाउँपालिकाका उपाध्यक्ष विष्णुप्रसाद भण्डारी सहित जनप्रतिनिधि र कर्मचारीको पनि उपस्थिती रहेको थियो ।
