तनहुँ । साउन १२
तनहुँको भिमाद बजार, ढोरफिर्दी लगायत देशभर रहेका अव्यवस्थित बसोबासको दीर्घकालीन व्यवस्थापन र लालपुर्जा (जग्गाधनी प्रमाण पुर्जा) वितरणका लागि नयाँ ऐन निर्माणको पहल सुरु गरिएको छ ।
तनहुँ क्षेत्र नम्बर २ का सांसद ई.श्रीराम न्यौपानेले अव्यवस्थित बसोबासलाई कानुनी दायरामा ल्याएर समाधान खोज्न ‘बस्ती विकास ऐन’ निर्माणको नयाँ अवधारणासहित कानुन मन्त्री सोभिता गौतमलाई अनुरोध पत्र हस्तान्तरण गरेका छन् ।
मन्त्री गौतमसँगको भेटमा सार्वजनिक जग्गामा लामो समयदेखि बसोबास गर्दै आएका नागरिकहरूको समस्या दीर्घकालीन रूपमा समाधान गर्न विद्यमान कानुनी व्यवस्थाको समीक्षा गरिएको सांसद न्यौपानेले बताए । नयाँ ऐनमार्फत आवश्यक कानुनी उपचार, व्यवस्थापन प्रक्रिया तथा लालपुर्जा उपलब्ध गराउने सम्भावनाका विषयमा मन्त्रीसमक्ष गम्भीर छलफल भएको सांसद न्यौपानेले बताए ।
यसअघि यो विषयमा भूमि व्यवस्था मन्त्री तथा भवन विभागका महानिर्देशक (डीजी) सँगसमेत परामर्श भइसकेको सांसद न्यौपानेले जानकारी दिएका छन् । उक्त भेटमा क्रममा अव्यवस्थित बसोबासलाई व्यवस्थित गर्दै नागरिकको आवासीय सुरक्षाको सुनिश्चितता गर्ने, सार्वजनिक जग्गाको उचित र व्यवस्थित प्रयोग सुनिश्चित गर्ने तथा दीर्घकालीन समाधानका लागि स्पष्ट एवं मजबुत कानुनी ढाँचा तयार पार्ने बारेमा छलफल गरिएको थियो ।
