देवघाट । साउन १६
जिल्ला भूमि समस्या समाधान समिति, तनहुँले देवघाट गाउँपालिकाबाट प्रमाणीकरण भई आएका भूमिहीन दलित तथा भूमिहीन सुकुम्बासीहरूलाई निःशुल्क जग्गा उपलब्ध गराउने प्रक्रिया अन्तर्गत सात दिने सार्वजनिक सूचना जारी गरेको छ ।
नेपाल सरकारको भूमि सम्बन्धी गठन आदेश र नियमावली अनुसार गाउँपालिकाबाट सिफारिस भई आएका आवेदकहरूको दाबी विरोध तथा संशोधनका लागि उक्त सुचना प्रकाशित गरिएको समितिले जनाएको छ ।
शुक्रबार प्रकाशित सुचनामा देवघाट गाउँपालिकाबाट प्रमाणित भई आएका भूमिहीन दलित आवेदकहरूको विवरण समेटिएको छ । देशभर आफ्नो वा परिवारका सदस्यको नाममा जग्गा–जमिन नभएको र आय–आर्जनबाट जग्गा प्रबन्ध गर्न असमर्थ रहेकाले तोकिएको हदभित्र रही निःशुल्क जग्गा पाउन आवेदन परेको जनाइएको छ ।
उल्लेखित विवरण संशोधन गर्नु परेमा आवेदक स्वयंले वा कुनै दाबी विरोध/उजुरी भए जो–सुकैले यो सूचना प्रकाशित भएको मितिले सात दिनभित्र प्रमाणसहित निवेदन दर्ता गराउन समितिले आह्वान गरेको छ ।
भूमि समस्या समाधान समिति तनहुँले उजुरी वा दाबी विरोधका लागि तोकिएको समयभित्र आवश्यक प्रमाणसहित कार्यालयमा सम्पर्क राख्न अनुरोध गरेको छ ।
