बन्दिपुर, कार्तिक १२
आजदेखी बन्दिपुरमा बृहत निशुल्क स्वास्थ्य शिविर आयोजना गरिएको छ । बन्दिपुर गाउँपालिका, बन्दिपुर अस्पताल र बिकोल फाउन्डेशन अमेरिकाको संयुक्त आयोजित सो निशुल्क स्वास्थ्य शिविर कार्तिक १६ गतेसम्म सन्चालन हुनेछ ।
उक्त शिविरमा नेपाली र अमेरिकन चिकित्सकहरुले स्वास्थ्य परिक्षण गर्नेछन् । शिविर अन्तर्गत आज र भोली आँखा जाँच तथा औषधी वितरण हुनेछ । आँखा परिक्षणमा यदी मोती बिन्दुको शल्यक्रिया गर्नु परेमा कार्तिक १८ गते दृष्टि अस्पताल पोखरा र मंसिर ७ गते भानु नपा–२ नारेश्वरटारमा निशुल्क शल्यक्रिया गरिने बन्दिपुर गाउँपालिकाका अध्यक्ष सुरेन्द्र थापाले बताए ।
यसैगरि आईतबार र सोमबार नै नाक, कान र घाँटीको निशुल्क परिक्षण र औषधी वितरण हुनेछ । यदी नाक, कान र घाँटीको शल्यक्रिया गर्नु परेमा त्रिवि शिक्षण अस्पताल काठमाडौंमा निशुल्क शल्यक्रिया गरिने बन्दिपुर अस्पतालका प्रशासन प्रमुख भगवान त्रिपाठीले जानकारी दिए ।
यस्तै कार्तिक आईतबार र सोमबार नै स्त्रि रोग विशेषज्ञद्वारा स्वास्थ्य परिक्षण हुनेछ । यसैगरि १२ देखी १६ गतेसम्म अमेरिकन तथा नेपाली जनरल फिजिसियनद्वारा स्वास्थ्य परिक्षण र औषधी वितरण गरिनेछ ।
शिविरको बन्दिपुर गाउँपालिकाका अध्यक्ष सुरेन्द्र थापाले शुभारम्भ गरे । सो अवसरमा अध्यक्ष थापाले बन्दिपुरमा भएको यो स्वास्थ्य शिविरको बन्दिपुर गाउँपालिकाबासी र अन्य स्थानीय तहका नागरिकले पनि फाईदा लिनुपर्ने बताए ।
शिविरमा उल्लेख्य संख्यामा सर्वसाधरणको सहभागिता रहेको बन्दिपुर अस्पतालका प्रशासन प्रमुख त्रिपाठीले जानकारी दिए ।
