दमौली, कार्तिक १५
तनहुँ जिल्लामा बुधबार दिउँसोसम्म ६६६६ जना डेंगु संक्रमित भएका छन् । स्वास्थ्य कार्यालय तनहुँका अनुसार सबैभन्दा धेरै व्यास नगरपालिकामा ५४७५ जना डेंगुका विरामी रहेका छन् ।
त्यसपछि शुक्लागन्डकी नपामा ४९६ जना, ऋषिङमा १९४ जना, भिमादमा १८४ जना, म्याग्देमा ११० जना डेंगुका विरामी रहेका छन् । त्यस्तै भानु नगरपालिकामा ८४ जना, बन्दिपुरमा ४७, आवुँखैरेनीमा ३९ जना, देवघाटमा २२ जना र घिरिङमा ९ जना डेंगुका विरामी रहेको स्वास्थ्य कार्यालय तनहुँले जनाएको छ । संक्रमित मध्ये ५४ प्रतिशत महिला र ४६ प्रतिशत पुरुष रहेका छन् ।
कुल संक्रमितको ८२ प्रतिशत व्यास नगरपालिकामा मात्रै रहेको स्वास्थ्य कार्यालय तनहुँका प्रमुख शंकरवावु अधिकारीले बताए । व्यास नगरपालिकामा सबैभन्दा धेरै वडा नम्बर १ मा १४६१ जना रहेका छन् । त्यसैगरि वडा नम्बर २ मा १३५६ जना संक्रमित भएका छन् । त्यस्तै वडा नम्बर ३ मा ६३५ र वडा नम्बर ४ मा ९६५ जना डेंगुका संक्रमित रहेका छन् ।
तनहुँमा हालसम्म डेंगुबाट ५ जनाको मृत्यु भएको कार्यालयले जनाएको छ । मृत्यु हुनेमा सबै व्यास नगरपालिकाका रहेका छन् ।
फूलबारी, गमला, एसी, फ्रिज, छत, कौसीको पानी जम्ने ठाउँमा यस्तो लामखुट्टेले फुल पार्ने र त्यो फुल एकवर्षसम्म पनि रहन सक्ने भएकोले सधैंभरी जोखिम रहने स्वास्थ्यकर्मीको भनाई छ । खासगरि वर्षाको पानी जम्ने भाडाकुँडा, टिनका बट्टा, पुराना टायर, खालि ड्रम, फूलदानी, गमला, पानी ट्यांकी लगायतका भाडामा लामखुट्टेले फुल पार्छ । त्यसैले वर्षातको पानी जम्ने सिजनमा यो रोग फैलिने गरेको चिकित्सकले बताएका छन् ।
चिकित्सकका अनुसार डेंगी संक्रमण भएपनि उच्च ज्वरो आउने, जिउ, जोर्नी र हाड दुख्ने गर्छ । त्यस्तै आँखाको गेडी वरिपरि दुख्ने, वाकवाकि लाग्ने, वान्ता हुने, खान मन नलाग्ने, छालामा रगत जमेको धब्बा देखिने, नाक, गिजा, तथा शरीरका अन्य अंगबाट रगत बग्ने सम्भावना रहेको चिकित्सकले बताएका छन् ।
